തിരുവനന്തപുരം: ഖത്തറില്‍നിന്നുള്ള 181 അംഗ പ്രവാസി സംഘവുമായി ദോഹ -തിരുവനന്തപുരം എയര്‍ ഇന്ത്യ എക്‌സപ്രസ് ഇന്നലെയെത്തി. പുലര്‍ച്ചെ ഒരു മണിയോടെയാണ് വിമാനം തിരുവനന്തപുരം അന്താരാഷ്ട്ര വിമാനത്താവളത്തിലെത്തിയത്. 

ദോഹ സമയം വൈകിട്ട് 4.30ന് പുറപ്പെടേണ്ടിയിരുന്ന വിമാനം രണ്ടു മണിക്കൂര്‍ വൈകി 6.25 നാണ് പുറപ്പെട്ടത്. യാത്രക്കാരില്‍ 39 ഗര്‍ഭിണികളും പത്തു വയസിനു താഴെയുള്ള 22 കുട്ടികളും രണ്ടു മുതിര്‍ന്ന പൗരന്മാരുമുണ്ടായിരുന്നു. രോഗം ബാധിച്ചയാളുമായി വിദേശത്തു വച്ച് സമ്പര്‍ക്കമുണ്ടായ ഒരു യാത്രക്കാരനെയും ഒരു പൂര്‍ണ ഗര്‍ഭിണിയെയും ആശുപത്രിയില്‍ പ്രവേശിപ്പിച്ചു. യാത്രക്കാരില്‍ 81 പേരെ സര്‍ക്കാരിന്റെ നിരീക്ഷണ കേന്ദ്രത്തിലേക്ക് മാറ്റി. ഗര്‍ഭിണികളും കുട്ടികളുമുള്‍പ്പടെ 80 പേരെ വീടുകളില്‍ നിരീക്ഷണത്തിലാക്കി. തമിഴ്‌നാട് സ്വദേശികളായ 18 പേരെ കെ.എസ്.ആര്‍.ടിസി ബസില്‍ അവിടെയെത്തിച്ചു. 

വിമാനത്താവളത്തില്‍ വച്ചുതന്നെ യാത്രക്കാര്‍ക്ക് വിശദമായ വൈദ്യപരിശോധന നടത്തി. ആര്‍ക്കും രോഗലക്ഷണമുണ്ടായിരുന്നില്ല. വന്ദേഭാരത് മിഷന്റെ ഭാഗമായി പ്രവാസി സംഘവുമായി തിരുവനന്തപുരത്തേക്കെത്തിയ ആദ്യവിമാനമാണ് ഇത്. കഴിഞ്ഞ ഞായാറാഴ്ച്ച രാത്രി 10.45 ന് എത്തേണ്ടിയിരുന്ന വിമാനം ഖത്തറില്‍നിന്ന് അനുമതി ലഭിക്കാതിരുന്നതിനെ തുടര്‍ന്ന് റദ്ദാക്കിയിരുന്നു.