കോട്ടയം: കേരളത്തില്‍് ഏറ്റവും അധികം മൂലധന നിക്ഷേപം എത്തിക്കുന്ന പ്രവാസികളെ അവഗണിക്കുന്ന ബജറ്റാണ് ധനകാര്യമന്ത്രി തോമസ് ഐസക് അവതരിപ്പിച്ചതെന്ന് ഒഐസിസി ഗ്ലോബല്‍ ഓര്‍ഗനൈസിഗ് ജനറല്‍ സെക്രട്ടറി ശങ്കര്‍പിള്ള കുമ്പളത്ത്.
വിദേശരാജ്യങ്ങളിലെ മാന്ദ്യം പ്രവാസികള്‍ക്കിടയില്‍ ഉയര്‍ത്തുന്ന ആശങ്ക ഏറെയാണ്. പ്രവാസ ജീവിതം അവസാനിപ്പിച്ച് തിരിച്ചുവരുന്നവരുടെ എണ്ണം നാള്‍ക്കുനാള്‍ വര്‍ദ്ധിക്കുകയാണ്. ഇവരുടെ പുനരധിവാസം ആവശ്യമെന്ന് ബജറ്റില്‍ പ്രസംഗത്തില്‍ ധനകാര്യമന്ത്രി പറയുന്നുണ്ടെങ്കിലും ആശ്വാസകരമായ യാതൊരു പദ്ധതിയും ആവിഷ്‌കരിച്ചിട്ടില്ല. പ്രവാസികള്‍ക്ക് പുതിയസംരംഭങ്ങള്‍ തുടങ്ങുന്നതിന് സഹായങ്ങള്‍ നല്‍കേണ്ടത് സര്‍ക്കാരിന്റെ ഉത്തരവാദിത്വമാണ്.
പ്രവാസികള്‍ക്ക് ഇന്‍ഷുറന്‍സ് പരിരക്ഷ നല്‍കേണ്ട അടിയന്തര സാഹചര്യമാണ് നിലവിലുള്ളത്. ഇത്തരം പദ്ധതികളൊന്നും ബജറ്റില്‍ പറഞ്ഞിട്ടില്ല. കേരളത്തിന്റെ പൊതുഖജനാവിനെ താങ്ങി നിര്‍ത്തുന്നതില്‍ വിദേശികളുടെ പങ്ക് വലുതാണ്. എന്നാല്‍ ഇവരുടെ കുടുംബങ്ങള്‍ക്ക്് ആവശ്യമായ യാതൊരു പരിരക്ഷയും നല്‍കുന്നത്് സര്‍ക്കാര്‍ പരിഗണിക്കുന്നില്ല.
കേരളത്തില്‍ പൊതുനിക്ഷേപം വര്‍ദ്ധിപ്പിക്കാന്‍ ശ്രമിക്കുന്ന ധനകാര്യമന്ത്രി പ്രവാസികളെ മറന്നു കൊണ്ടുള്ള ബജറ്റ് അവതരണം പ്രവാസികളോടുള്ള കനത്ത അവഗണനയാണ്. കഴിഞ്ഞ യുഡിഎഫ് ബജറ്റില്‍ പ്രവാസികളുടെ ആവശ്യങ്ങള്‍ക്ക് പരിഗണന നല്‍കിയിരുന്നു.
ഓമാനില്‍ വെച്ച് ദാരുണമായി കൊലചെയ്യപ്പെട്ട മണര്‍ക്കാട് സ്വദേശി ജോണ്‍ ഫിലിപ്പിന്റെയും കുടുംബത്തിനും ആവശ്യമായ സഹായങ്ങള്‍ ഒഐസിസി നല്‍കും.
ഒ.ഐ.സി.സി ഗ്ലോബല്‍ ഓര്‍ഗനൈസിഗ് ജനറല്‍ സെക്രട്ടറി ശങ്കര്‍പിള്ള കുമ്പളത്ത്, ഒമാന്‍ നാളണല്‍ കമ്മറ്റി ഉപാധ്യക്ഷരായ സജി ഔസേപ്പ്, എസ്. പി. നായര്‍ എന്നിവരടങ്ങുന്ന സംഘം ജോണ്‍ഫിലിപ്പിന്റെ വീട് സന്ദര്‍ശിച്ചു. പ്രവാസികളുടെ സ്വത്തിനും സുരക്ഷയ്ക്കും സംരക്ഷണം നല്‍കാന്‍ സംസ്ഥാന കേന്ദ്ര സര്‍ക്കാരുകളുടെ കൂട്ടായ പരിശ്രമം ഉണ്ടാകുന്നില്ലെന്നും അദ്ദേഹം പറഞ്ഞു.