ഇസ്‌ലാമാബാദ്: പാകിസ്താന്‍ താലിബാന്‍ പുതിയ നേതാവിനെ തിരഞ്ഞെടുത്തു. മുഫ്തി നൂര്‍ വലി മെഹ്‌സൂദ് ആണ് സംഘത്തിന്റെ പുതിയ മേധാവി. അടുത്തിടെ കൊല്ലപ്പെട്ട മുല്ലാ ഫസ്‌ലുല്ലയ്ക്കു പകരക്കാരനായാണ് നൂര്‍ വലി മെഹ്‌സൂദ് അധികാരമേറ്റത്.
39കാരനായ മെഹ്‌സൂദ് നൊബേല്‍ പുരസ്‌കാര ജേതാവ് മലാല യൂസുഫ് സായിയെ കൊലപ്പെടുത്താന്‍ ആഹ്വാനം ചെയ്തു കുപ്രസിദ്ധിയാര്‍ജിച്ചയാള്‍ കൂടിയാണ്. 1978 ജൂണ്‍ 26ന് ദക്ഷിണ വസീറിസ്താനിലെ ഒരു ഗ്രാമത്തിലാണ് മെഹ്‌സൂദ് ജനിച്ചത്. ഉപമേധാവിയായി മുഫ്തി ഹസ്‌റത്തുല്ലയെയും തിരഞ്ഞെടുത്തിട്ടുണ്ട്.
മുഫ്തി മെഹ്‌സൂദ് രചിച്ച 'ഇംഗിലാബെ മെഹ്‌സൂദ് സൗത്ത് വസീരിസ്താന്‍: ഫറംഗിരാജ് സേ അംരീകി സമാജ് തക് '(മെഹ്‌സൂദ് വിപ്ലവവും ദക്ഷിണ വസീറിസ്താനും: ബ്രിട്ടീഷ് ഭരണം മുതല്‍ അമേരിക്കന്‍ അധിനിവേശം വരെ) എന്ന പുസ്തകം അടുത്തിടെയാണു പുറത്തുവന്നത്.
2007ല്‍ റാവല്‍പിണ്ടിയില്‍ നടന്ന ബേനസീര്‍ ഭൂട്ടോ വധത്തില്‍ താലിബാനു പങ്കുണ്ടെന്ന് പുസ്തകത്തില്‍ മെഹ്‌സൂദ് അവകാശപ്പെട്ടിരുന്നു.
ആഴ്ചകള്‍ക്കു മുന്‍പാണ് മുല്ലാ ഫസ്‌ലുല്ല യു.എസ് ഡ്രോണ്‍ ആക്രമണത്തില്‍ കൊല്ലപ്പെട്ടത്. അഫ്ഗാനിസ്താനിലെ കുനാര്‍ പ്രവിശ്യയിലായിരുന്നു സംഭവം.