കല്‍പ്പറ്റ: ജില്ലയില്‍ ലഹരിക്കെതിരായ ജനമൈത്രി എക്‌സൈസിന്റെ പ്രവര്‍ത്തനം വ്യാപിപ്പിക്കാന്‍ കലക്ടറുടെ നിര്‍ദേശം.
ലഹരി ഉപയോഗത്തിനെതിരെ ആദിവാസി കോളനികള്‍ കേന്ദ്രീകരിച്ച് ബോധവല്‍കരണ ക്ലാസ്സുകളും പരിപാടികളും നടത്തുന്ന ജനമൈത്രി എക്‌സൈസ് പ്രവര്‍ത്തനം ജില്ലയൊട്ടാകെ വ്യാപിപ്പിക്കാന്‍ ആലോചിക്കുന്നതായി ജില്ലാ കലക്ടര്‍ ഡോ. ബി.എസ് തിരുമേനിയാണ് ജില്ലാതല ജനകീയ കമ്മിറ്റിയുടെ യോഗത്തില്‍ പറഞ്ഞത്. നിലവില്‍ മാനന്തവാടി താലൂക്കില്‍ മാത്രമാണ് ജനമൈത്രി എക്‌സൈസ് പ്രവര്‍ത്തിക്കുന്നത്. കോളനിവാസികള്‍ക്കിടയില്‍ ലഹരിക്കെതിരെ മികച്ച രീതിയില്‍ ബോധവല്‍കരണം നടത്താനും പരമാവധി ആളുകളെ പിന്തിരിപ്പിക്കാനും കോളനികളില്‍ സൗഹൃദാന്തരീക്ഷം സൃഷ്ടിക്കാനും ജനമൈത്രി പ്രവര്‍ത്തനത്തിലൂടെ സാധ്യമാകുന്നതായി അദ്ദേഹം വിലയിരുത്തി.
വിഷു-ഈസ്റ്റര്‍ പ്രമാണിച്ച് അതിര്‍ത്തി കടന്ന് ലഹരിവസ്തുക്കള്‍ ജില്ലയിലെത്താനുള്ള സാധ്യതയുള്ളതിനാല്‍ ചെക്ക് പോസ്റ്റുകളില്‍ കൂടുതല്‍ ഉദ്യോഗസ്ഥരെ നിയോഗിച്ച് വാഹന പരിശോധന കര്‍ശനമാക്കും. എക്‌സൈസ്-ട്രൈബല്‍-പൊലിസ്-റവന്യൂ-വനം വകുപ്പുകളെ ഏകോപിപ്പിച്ച് സംയുക്ത റെയ്ഡുകള്‍ നടത്തും. കോളനികളിലെ ലഹരി വില്‍പന സംബന്ധിച്ച രഹസ്യവിവരം നല്‍കാന്‍ ട്രൈബല്‍ പ്രൊമോട്ടര്‍മാര്‍, സന്നദ്ധ സാമൂഹ്യ പ്രവര്‍ത്തകര്‍, ജനകീയ കമ്മിറ്റി പ്രവര്‍ത്തകര്‍ ശ്രദ്ധിക്കണമെന്നും ജില്ലാ കലക്ടര്‍ പറഞ്ഞു. രാത്രിയില്‍ ഊടുവഴികളില്‍ വാഹനപരിശോധന കര്‍ശനമാക്കും. സീസണ്‍ പ്രമാണിച്ച് വ്യാജമദ്യലോബികള്‍ വ്യാജമദ്യ ഉല്‍പാദനവും കടത്തും വ്യാപകമാക്കാന്‍ സാധ്യതയുള്ളതിനാല്‍ ഇത്തരം കുറ്റകൃത്യങ്ങള്‍ തടയുന്നതിന് എക്‌സൈസ് വകുപ്പ് ശക്തമായ മുന്‍കരുതല്‍ നടപടികള്‍ സ്വീകരിച്ചിട്ടുണ്ട്.