തൃക്കരിപ്പൂര്‍: അണ്ണാരക്കണ്ണനും തന്നാലായത് എന്നു പറഞ്ഞതുപോലെയാണ് തങ്കയത്തിലെ ആറും ഏഴും വയസുള്ള കുട്ടികളുടെ പ്രവര്‍ത്തനം. മുതിര്‍ന്നവരുടെ പോലും കണ്ണു തുറപ്പിക്കുന്നതാണ് ഈ കുരുന്നു മനസുകളുടെ കാരുണ്യം. താലൂക്ക് ആശുപത്രിയിലേക്കു മരുന്നു ബോട്ടിലുകള്‍ വാങ്ങിയാണ് ഇവര്‍ കുരുന്നു പ്രായത്തിലെ തങ്ങളുടെ സാമൂഹിക പ്രതിബദ്ധത തെളിയിച്ചത്. ഫുട്‌ബോള്‍ മേള സംഘടിപ്പിച്ചാണ് ഈ ബോട്ടിലുകള്‍ വാങ്ങാനുള്ള കാശ് കുട്ടികള്‍ സംഭരിച്ചത്.
സ്‌കൂള്‍ അവധി ആഘോഷിക്കുന്നതിന്റെ ഭാഗമായി എല്‍.പി സ്‌കൂളുകളില്‍ പഠിക്കുന്ന കുട്ടികള്‍ സബ് ജൂനിയര്‍ ഫുട്‌ബോള്‍ മേള സംഘടിപ്പിച്ചിരുന്നു. ഇതില്‍ നിന്നു മിച്ചം വന്ന തുക ഉപയോഗിച്ച് മരുന്നു ബോട്ടിലുകള്‍ വാങ്ങി തൃക്കരിപ്പൂര്‍ താലൂക്ക് ആശുപത്രിക്ക് സംഭാവന ചെയ്തു.
നിര്‍ധന രോഗികള്‍ക്കു മരുന്നു വാങ്ങാനുള്ള ബോട്ടിലുകളാണ് കുട്ടികളുടെ കാരുണ്യത്തില്‍ ആശുപത്രിയില്‍ എത്തിയത്.
ബോട്ടിലുകള്‍ ഏറ്റുവാങ്ങാനെത്തിയ ആശുപത്രി മെഡിക്കല്‍ ഓഫിസറും കുട്ടികളുടെ സ്‌പെഷലിസ്റ്റ് ഡോ. സി.കെ.പിയും കുട്ടികളുടെ കാരുണ്യ ബോധത്തില്‍ അഭിമാനം കൊണ്ടു.