കല്‍പ്പറ്റ: ജില്ലയിലെ വിവിധ അണ്‍ എയ്ഡഡ് സ്‌കൂളുകള്‍ ഒന്നാം ക്ലാസില്‍ അഡ്മിഷന്‍ നേടുന്നതിന് വേണ്ടി ഇന്റര്‍വ്യൂവും സ്‌ക്രീനിങ്ങും നടത്തി പിഞ്ചു കുട്ടികളെ മാനസികമായി പീഡിപ്പിക്കുന്ന രീതി അനുവദിക്കാനാവില്ലെന്ന് കെ.എസ്.യു വയനാട് ജില്ലാ കമ്മിറ്റി.
 വിദ്യാഭ്യാസം അവകാശമാക്കിയിട്ടുള്ള രാജ്യത്ത് ഇത്തരം നടപടികള്‍ കുട്ടികളുടെ അവകാശത്തിന്മേലുള്ള കടന്നുകയറ്റമാണ്. വിദ്യാര്‍ഥികള്‍ക്ക് ലഭിക്കേണ്ട തുല്യ നീതി മുളയിലേ നുള്ളിക്കളയുന്ന ഇത്തരം സമീപനങ്ങളുമായി മുന്നോട്ട് പോയാല്‍ മാനേജ്‌മെന്റുകള്‍ക്കെതിരേ ശക്തമായ സമര പരിപാടികള്‍ക്ക് നേതൃത്വം കൊടുക്കാനും പിഞ്ചു കുട്ടികളെ പീഡിപ്പിക്കുന്ന തരത്തില്‍ ഇന്റര്‍വ്യൂവിലൂടെയും സ്‌ക്രീനിങ്ങിലൂടെയും നടത്തുന്ന അഡ്മിഷനുകള്‍ തടയാനും യോഗം തീരുമാനിച്ചു. ജില്ലാ പ്രസിഡന്റ് അമല്‍ ജോയ്, അജില്‍ ജെയിംസ്, ആഗിന്‍ ടോം, സി.കെ അരുണ്‍, നിഖില്‍ തോമസ്, അമല്‍ പങ്കജാക്ഷന്‍, ഷൈജിത്, കെ.ആര്‍ ഗായോസ്, സി സുശോബ്, ഒ.എസ് സൂരജ്, ജസ്റ്റിന്‍ പോള്‍, അജിത് തുടങ്ങിയവര്‍ സംസാരിച്ചു.