റിയാദ്: സഊദിയിൽ ഏതാനും ആളുകൾ തമ്മിലുണ്ടായ കലഹത്തിനിടെ നടന്ന വെടി വെപ്പിൽ ആറു പേർ കൊല്ലപ്പെട്ടു. തെക്കു പടിഞ്ഞാറൻ മേഖലയിലെ അസീർ പ്രവിശ്യയിലെ അംവാഹ്‌ ഗവർണറേറ്റിന് കീഴിലാണ് സംഭവം. വെടിവെപ്പിൽ മൂന്ന് പേർക്ക് പരിക്കേൽക്കുകയും ചെയ്‌തിട്ടുണ്ട്‌. പരിക്കേറ്റവരെ ആശുപത്രിയിലേക്ക് മാറ്റുകയും ആയുധങ്ങൾ പിടിച്ചെടുക്കുകയും ചെയ്‌തതായി അസീർ പ്രവിശ്യ പോലീസ് മേധാവി കേണൽ സൈദ് മുഹമ്മദ് അൽ ദബ്ബാഷ് അറിയിച്ചു. മരണപ്പെട്ടവർ മുപ്പത്, നാൽപത് വയസുകൾക്കിടയിലുള്ളവരാണ്. അറസ്‌റ്റ് ചെയ്തവരെ തുടർന് നടപടികൾക്കായി പ്രോസിക്യൂഷന് കൈമാറി. കലഹത്തിനിടയായ കാരണം വ്യക്തമല്ല.