ഇടപ്പഴിഞ്ഞി എസ്.കെ ആശുപത്രിയില്‍ ജീവനക്കാരിയായിരുന്ന യുവതിയാണ് ആശുപത്രി കെട്ടിടത്തില്‍ നിന്നും ചാടി ആത്മഹത്യ ചെയ്തത്
തിരുവനന്തപുരം: സ്വകാര്യാശുപത്രിയില്‍ ജീവനക്കാരിയായിരുന്ന യുവതി, അതേ ആശുപത്രിയുടെ മുകളില്‍ നിന്ന് ചാടി മരിച്ച സംഭവത്തില്‍ ഉന്നതതല അന്വേഷണത്തിന് സംസ്ഥാന മനുഷ്യാവകാശ കമ്മിഷന്‍ ഉത്തരവ്. ജില്ലാ പൊലിസ് മേധാവി സംഭവത്തെ കുറിച്ച് വിശദമായ അന്വേഷണം നടത്തി ഒരു മാസത്തിനകം റിപ്പോര്‍ട്ട് സമര്‍പ്പിക്കണമെന്ന് കമ്മിഷന്‍ ആവശ്യപ്പെട്ടു. ആശുപത്രി അധികൃതരും   ഒരു മാസത്തിനുള്ളില്‍ റിപ്പോര്‍ട്ട് ഫയല്‍ ചെയ്യണം.
ഇടപ്പഴിഞ്ഞിയിലെ എസ്.കെ ആശുപത്രിയില്‍ ജീവനക്കാരിയായിരുന്ന  പ്രാവച്ചമ്പലം സ്വദേശിനി അഞ്ജു (23) വാണ് ആശുപത്രി കെട്ടിടത്തിന് മുകളില്‍ നിന്നും താഴേക്ക് ചാടിയത്. ഗുരുതരമായി പരുക്കേറ്റ യുവതി മെഡിക്കല്‍ കോളേജില്‍ ചികിത്സയിലായിരിക്കെ ഇക്കഴിഞ്ഞ 13ന് മരിച്ചു.
യുവതി 2014-2016 കാലയളവില്‍ ആശുപത്രിയില്‍ ജീവനക്കാരിയായിരുന്നു.  മറ്റൊരു ജോലി നേടുന്നതിന് ആശുപത്രി അധികൃതര്‍ പ്രവൃത്തി പരിചയ സര്‍ട്ടിഫിക്കറ്റ് നല്‍കാത്തതാണ് ആത്മഹത്യക്ക് കാരണമെന്ന് പരാതിയുണ്ട്. ആശുപത്രി അധികൃതര്‍ അഞ്ചുവിനെ പലതവണ വിളിച്ചുവരുത്തി മാനസികമായി പീഡിപ്പിച്ചതായി മനുഷ്യാവകാശ പ്രവര്‍ത്തകന്‍ പി.കെ രാജു സമര്‍പ്പിച്ച പരാതിയില്‍ പറയുന്നു. അഞ്ചുവിന്റെ കുടുംബത്തിന് ആശുപത്രി അധികൃതരില്‍ നിന്നും നഷ്ടപരിഹാരം വാങ്ങി നല്‍കണമെന്നും പരാതിക്കാരന്‍ ആവശ്യപ്പെട്ടു.