കോഴിക്കോട്: നിപാ വൈറസ് പ്രതിരോധവുമായി ബന്ധപ്പെട്ട് സംസ്ഥാന സര്‍ക്കാര്‍ ഇറക്കിയ പരസ്യത്തില്‍ ശ്രദ്ധേയമായ ഇടപെടല്‍ നടത്തിയ കൂട്ടത്തില്‍ അന്താരാഷ്ട്ര, ദേശീയ മാധ്യമങ്ങള്‍ക്കൊപ്പം സുപ്രഭാതവും. സംസ്ഥാന ആരോഗ്യ വകുപ്പ് മാസ് മീഡിയ വിഭാഗം തയാറാക്കിയ 'ആരോഗ്യ കേരളത്തിന് അഭിമാനിക്കാം' എന്ന പരസ്യത്തിലാണ് നിപാ വൈറസ് കാലത്ത് 'സുപ്രഭാതം' പുറത്തുവിട്ട എസ്‌ക്ലൂസിവ് വാര്‍ത്തയും ഇടംപിടിച്ചത്. അന്താരാഷ്ട്രം, ദേശീയം, മലയാളം പത്രങ്ങളിലെ ഒരു വാര്‍ത്ത വീതമാണു പരസ്യത്തിനു തിരഞ്ഞെടുത്തത്. ഇതില്‍ മലയാള മാധ്യമങ്ങളില്‍ ഉള്‍പ്പെട്ടത് സുപ്രഭാതം വാര്‍ത്തയാണ്.

നിപാ പ്രതിരോധ പ്രവര്‍ത്തനങ്ങള്‍ക്കിടെ അന്തരിച്ച നഴ്‌സ് ലിനിയെ കുറിച്ച് ലണ്ടന്‍ ആസ്ഥാനമായി പ്രവര്‍ത്തിക്കുന്ന പ്രമുഖ മാഗസിന്‍ 'ദി എക്‌ണോമിസ്റ്റ് ' തയാറാക്കിയ റിപ്പോര്‍ട്ട്, നിപായെ നേരിട്ട ആരോഗ്യ മന്ത്രി കെ.കെ ശൈലജ, ആരോഗ്യ വകുപ്പ് ഡയരക്ടര്‍ ഡോ. ആര്‍.എല്‍ സരിത, അഡിഷനല്‍ ആരോഗ്യ വകുപ്പ് ഡയരക്ടര്‍ ഡോ. കെ.ജെ റീന എന്നീ വനിതകളെ കുറിച്ച് 'ന്യൂ ഇന്ത്യന്‍ എക്‌സ്പ്രസ് ' പ്രസിദ്ധീകരിച്ച വാര്‍ത്ത എന്നിവയ്‌ക്കൊപ്പമാണ് സുപ്രഭാതം സീനിയര്‍ റിപ്പോര്‍ട്ടര്‍ കെ. ജംഷാദ് തയാറാക്കിയ 'സംസ്ഥാന സര്‍ക്കാരിന് അഭിനന്ദനം ചൊരിഞ്ഞ് ഐക്യരാഷ്ട്രസഭ' എന്ന വാര്‍ത്തയും ഇടംപിടിച്ചത്. യു.എന്‍ അന്താരാഷ്ട്ര മീഡിയാ വിഭാഗമായ യു.എന്‍ ഡിസ്പാച്ചില്‍ സംസ്ഥാന സര്‍ക്കാരിന്റെ നിപാ പ്രതിരോധത്തെ കുറിച്ച് പ്രസിദ്ധീകരിച്ച റിപ്പോര്‍ട്ടിന്റെ ഉള്ളടക്കത്തെ കുറിച്ചാണ് ജൂണ്‍ 19നു വാര്‍ത്ത പ്രസിദ്ധീകരിച്ചത്.