ന്യൂഡല്‍ഹി: കൊവിഡ് വ്യാപനത്തെ തുടര്‍ന്നു വിവിധ സംസ്ഥാനങ്ങള്‍ തമ്മിലുള്ള യാത്രാ പ്രശ്‌നത്തില്‍ സുപ്രിംകോടതിയുടെ ഇടപെടല്‍. ഹരിയാന, ഡല്‍ഹി, ഉത്തര്‍പ്രദേശ് എന്നീ സംസ്ഥാനങ്ങള്‍ തമ്മിലുള്ള പ്രശ്‌നത്തിലാണ് കോടതിയുടെ നിര്‍ദേശം. അന്തര്‍സംസ്ഥാന യാത്രാ വിഷയത്തില്‍ മൂന്നു സംസ്ഥാനങ്ങളും ഒരാഴ്ചയ്ക്കുള്ളില്‍ ഏകീകൃത നയം രൂപീകരിക്കണമെന്ന് ആവശ്യപ്പെട്ട സുപ്രിംകോടതി, വിഷയത്തില്‍ മൂന്നു സംസ്ഥാനങ്ങളുടെയും യോഗം വിളിക്കാന്‍ കേന്ദ്രത്തോടും നിര്‍ദേശിച്ചു.
കൊവിഡ് വ്യാപനത്തെ തുടര്‍ന്ന് കഴിഞ്ഞ ദിവസം ഹരിയാനയിലേക്കുള്ള അതിര്‍ത്തി ഡല്‍ഹി അടച്ചത് വിവാദമായിരുന്നു. ലോക്ക്ഡൗണില്‍ ഇളവുകള്‍ പ്രഖ്യാപിച്ചതിനു പിന്നാലെ ഹരിയാന അതിര്‍ത്തി തുറന്നിരുന്നു. ഇതോടെയാണ് ഡല്‍ഹി അതിര്‍ത്തി അടച്ചത്. ഉത്തര്‍പ്രദേശിലെ നോയിഡിലും ഡല്‍ഹിയുമായുള്ള അതിര്‍ത്തി അടച്ചിട്ടിരിക്കുകയാണ്.
മുന്നറിയിപ്പില്ലാതെ റോഡ് അടച്ചതിനെ തുടര്‍ന്ന് ഡല്‍ഹി-ഹരിയാന അതിര്‍ത്തിയില്‍ വന്‍ ഗതാഗത സ്തംഭനവുണ്ടായിരുന്നു. തുടര്‍ന്ന് സമര്‍പ്പിക്കപ്പെട്ട ഹരജിയിലാണ് സുപ്രിംകോടതിയുടെ നിര്‍ദേശം.