ദോഹ: പുതിയ തൊഴില്‍ നിയമത്തിലെ സൗകര്യങ്ങള്‍ ഉപയോഗപ്പെടുത്തി ജോലി മാറ്റത്തിന് അപേക്ഷിക്കുന്നവരുടെ എണ്ണത്തില്‍ വര്‍ധനവ്. ഖത്തറിലെ ടൈപ്പിങ് സെന്ററുകളെ ഉദ്ധരിച്ച് ദി പെനിന്‍സുലയാണ് ഇക്കാര്യം റിപ്പോര്‍ട്ട് ചെയ്തത്. കുറഞ്ഞ വരുമാനക്കാരായ ജോലിക്കാര്‍ക്ക് തങ്ങളുടെ തൊഴിലുടമയെ മാറാന്‍ ഓണ്‍ലൈനായി അപേക്ഷ നല്കാന്‍ ടൈപ്പിങ് സെന്ററുകളില്‍ പ്രത്യേക സൗകര്യങ്ങള്‍ ഏര്‍പ്പെടുത്തിയതായി റിപ്പോര്‍ട്ട് പറയുന്നു.
രാജ്യത്തിനകത്തേക്ക് പ്രവേശിക്കാനും പുറത്തേക്ക് പോകാനും പ്രവാസികള്‍ക്ക് താമസിക്കാനുമുള്ള 2015ലെ 21-ാം നമ്പര്‍ നിയമ പ്രകാരം പ്രവാസി തൊഴിലാളികള്‍ക്ക് നിബന്ധനകളും ഉപാധികളും പ്രകാരം ജോലി മാറാനുള്ള സാധ്യതകള്‍ നല്‍കുന്നുണ്ട്.
പുതിയ നടപടി ക്രമങ്ങള്‍ വളരെ എളുപ്പവും എവിടെ നിന്നും നിര്‍വഹിക്കാനുമാവും. തങ്ങളുടെ ജോലി മാറ്റവുമായി ബന്ധപ്പെട്ട നടപടിക്രമങ്ങള്‍ പൂര്‍ത്തീകരിക്കാന്‍ സഹായിക്കണമെന്നാവശ്യപ്പെട്ട് നിരവധി തൊഴിലാളികള്‍ സമീപിക്കുന്നതായി അല്‍ ഗാനിമിലെ ടൈപ്പിങ് സെന്റര്‍ മാനേജര്‍ പറഞ്ഞു. ഓണ്‍ലൈനായി അപേക്ഷ നല്‍കാനുള്ള സര്‍വിസ് ചാര്‍ജ് ഓരോ സ്ഥലത്തും വ്യത്യസ്തമായാണ് ഈടാക്കുന്നത്. 30മുതല്‍ 50 റിയാല്‍ വരെയാണ് ഇന്‍ഡസ്ട്രിയല്‍ ഏരിയയിലും ദോഹയിലും തൊഴില്‍ മാറ്റ അപേക്ഷയ്ക്ക് സര്‍വിസ് സെന്ററുകള്‍ ഈടാക്കുന്ന ചാര്‍ജ്.
തങ്ങള്‍ നിരവധി തൊഴില്‍മാറ്റ അപേക്ഷകള്‍ വിജയകരമായി കൈമാറ്റം ചെയ്തതായി ദാറുല്‍ ഖുതുബിന് സമീപത്തെ ടൈപ്പിങ് സെന്റര്‍ മാനേജര്‍ വെളിപ്പെടുത്തി. നിലവില്‍ ജോലിചെയ്യുന്ന കമ്പനിയുടെയും ചേരാനുദ്ദേശിക്കുന്ന കമ്പനിയുടേയും കൊമേഴ്‌സ്യല്‍ റജിസ്‌ട്രേഷന്‍ (സി.ആര്‍) കോപ്പി, റസിഡന്‍സി പെര്‍മിറ്റ് എന്നിവയും തൊഴില്‍മാറ്റത്തിന് നിര്‍ബന്ധമായും ഉണ്ടായിരിക്കേണ്ടതാണ്. കൂടാതെ ഉപയോഗിക്കുന്ന ഫോണിന്റെ സിം കാര്‍ഡ് അപേക്ഷകന്റെ പേരിലുള്ളതുമായിരിക്കണം.
അപേക്ഷ സ്വീകരിച്ചതായി സന്ദേശം ലഭിച്ചു കഴിഞ്ഞാല്‍ അപേക്ഷകന് തന്റെ നിലവിലുള്ള തൊഴിലുടമയെ പിന്നീട് യാതൊരു അനുമതിക്കും സമീപിക്കേണ്ടതില്ല. പൊലിസ് ക്ലിയറന്‍സ് സര്‍ട്ടിഫിക്കറ്റിനായി മാതൃരാജ്യത്തിന്റെ എംബസിയെ സമീപിക്കാവുന്നതും തൊഴില്‍ മാറ്റഫോറം പൂരിപ്പിച്ച് നല്‍കി പുതിയ കമ്പനിയില്‍ നിന്നു സീലും ഒപ്പും വാങ്ങി ഗറാഫയിലെ പാസ്‌പോര്‍ട്ട് ഓഫിസില്‍ എത്താവുന്നതുമാണ്.