ചങ്ങരംകുളം: കുപ്രസിദ്ധ മോഷ്ടാവ് അടക്ക മോഷണക്കേസില്‍ ചങ്ങരംകുളം പൊലിസിന്റെ പിടിയിലായി. മക്കരപ്പറമ്പ് സ്വദേശി പുളിയമഠത്തില്‍ അബ്ദുല്‍ ലത്തീഫി(26)നെയാണ് ചങ്ങരംകുളം പൊലിസ് പിടികൂടിയത്.
സംസ്ഥാന പാതയില്‍ വാഹനപരിശോധനക്കിടെയാണ് കാളാച്ചാലില്‍ വച്ച് ഇയാള്‍ പിടിയിലായത്. വാഹനത്തില്‍ മോഷ്ടിച്ച അടക്കാ ചാക്കുകള്‍ കണ്ടെത്തിയതിനെ തുടര്‍ന്ന് നടത്തിയ ചോദ്യം ചെയ്യലിലാണ് ചങ്ങരംകുളം ചിയ്യാനൂര്‍ ആലംകോട് ചാലിശ്ശേരി ഭാഗങ്ങളിലായി നടന്ന നിരവധി അടക്ക മോഷണക്കേസിലെ പ്രതിയാണ് ഇയാളെന്ന് പൊലിസ് തിരിച്ചറിഞ്ഞത്. മൂന്നോളം കേസില്‍ പ്രതി കുറ്റം സമ്മതിച്ചതായി പൊലിസ് പറഞ്ഞു.
മുന്‍പ് സമാനമായ കേസില്‍ ജയില്‍ ശിക്ഷ കഴിഞ്ഞ് പുറത്തിങ്ങി മാസങ്ങള്‍ കഴിയും മുന്‍പാണ് പ്രതി പുതിയ മോഷണങ്ങള്‍ തുടങ്ങിയത്. കൂടുതല്‍ മോഷണങ്ങള്‍ പ്രതി നടത്തിയതായി സംശയിക്കുന്നുണ്ടെന്നും പ്രതിയെ കൂടുതല്‍ ചോദ്യം ചെയ്യാനുണ്ടെന്നും പൊലിസ് അറിയിച്ചു.
പൊന്നാനി കോടതിയില്‍ ഹാജരാക്കി.