തിരുവനന്തപുരം: മോദിഭരണം രാജ്യത്തെ ഇരുണ്ട യുഗത്തിലേക്ക് നയിച്ചെന്ന് കെ.പി.സി.സി ജനറല്‍ സെക്രട്ടറി തമ്പാനൂര്‍ രവി പറഞ്ഞു. ആറ്റിങ്ങല്‍ ലോക്‌സഭാ മണ്ഡലം യു.ഡി.എഫ് സ്ഥാനാര്‍ഥി അടൂര്‍ പ്രകാശിന്റെ കാട്ടാക്കട നിയോജക മണ്ഡലം കണ്‍വന്‍ഷന്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
കഴിഞ്ഞ അഞ്ചുവര്‍ഷം കൊണ്ട് മോദി ഇന്ത്യന്‍ സമ്പദ്‌വ്യവസ്ഥയെയും വികസനത്തെയും പിന്നോട്ടടിച്ചു. ആറ്റിങ്ങല്‍ നിയോജക മണ്ഡലത്തില്‍ കഴിഞ്ഞ കുറേ വര്‍ഷങ്ങളായി വികസന മുരടിപ്പാണ്. യു.ഡി.എഫ് സര്‍ക്കാര്‍ നടപ്പാക്കിയ വികസനം മാറ്റിനിര്‍ത്തിയാല്‍ കാര്യമായൊന്നും മണ്ഡലത്തില്‍ നടന്നിട്ടില്ല. മികച്ച സ്ഥാനാര്‍ഥിയാണ് അടൂര്‍ പ്രകാശ്. റവന്യൂ മന്ത്രിയെന്ന നിലയില്‍ അദ്ദേഹം നടപ്പാക്കിയ പദ്ധതികള്‍ അതിനുദാഹരണമാണ്. ദീര്‍ഘവീക്ഷണത്തോടെ പ്രവര്‍ത്തിക്കാന്‍ കഴിവുള്ള അടൂര്‍ പ്രകാശിനെ വിജയിപ്പിക്കേണ്ടത് ആറ്റിങ്ങല്‍ മണ്ഡലത്തിന്റെ കൂടി ആവശ്യമാണെന്നും തമ്പാനൂര്‍ രവി പറഞ്ഞു.
കാട്ടാക്കട നിയോജക മണ്ഡലം ചെയര്‍മാന്‍ ശ്യാംകുമാര്‍ അധ്യക്ഷനായി.