ഗാന്ധിനഗര്‍: ലോക്‌സഭാ തെരഞ്ഞെടുപ്പില്‍ മത്സരിക്കുന്നതില്‍ നിന്ന് മുതിര്‍ന്ന നേതാക്കളായ എല്‍.കെ അദ്വാനിയെയും മുരളി മനോഹര്‍ ജോഷിയെയും തഴഞ്ഞതിനു പിന്നാലെ, അവരെ പുകഴ്ത്തി ബി.ജെ.പി അധ്യക്ഷന്‍ അമിത്ഷാ. അടല്‍ ബിഹാരി വാജ്‌പേയിയും എല്‍.കെ അദ്വാനിയും മത്സരിച്ച സീറ്റില്‍ നിന്നു മത്സരിക്കുന്നതില്‍ താന്‍ അനുഗ്രഹീതനാണെന്ന് ഷാ പറഞ്ഞു.

ഗുജറാത്ത് തലസ്ഥാനമായ ഗാന്ധിനഗറില്‍ നിന്ന് മത്സരിക്കുന്ന അമിത് ഷാ നാമനിര്‍ദേശ പത്രിക സമര്‍പ്പിച്ച ശേഷം പ്രസംഗിക്കുകയായിരുന്നു. ഗാന്ധിനഗറില്‍ റോഡ് ഷോ നടത്തിയതിന് ശേഷമാണ് അദ്ദേഹം പത്രിക സമര്‍പ്പിച്ചത്.

പത്രിക നല്‍കുന്നതിന്റെ ഭാഗമായി വലിയ ശക്തിപ്രകടനമാണ് ഗാന്ധിനഗറില്‍ ബി.ജെ.പി നടത്തിയത്. ഗാന്ധിനഗറിലെ പൊതുപരിപാടിയില്‍ കേന്ദ്രമന്ത്രിമാരായ രാജ്‌നാഥ് സിങ്, നിതിന്‍ ഗഡ്കരി, ശിവസേന തലവന്‍ ഉദ്ദവ് താക്കറെ എന്നിവര്‍ അമിത് ഷായ്‌ക്കൊപ്പം വേദി പങ്കിട്ടു.