തലശ്ശേരി: തലശ്ശേരിയില്‍ ആറുലക്ഷം രൂപ വിലവരുന്ന ബ്രൗണ്‍ഷുഗറുമായി മുംബൈ പനവേല്‍ സ്വദേശി ഫായിസ് അഹമ്മദ് അബ്ദുല്‍ഖാദറിനെ (55) പൊലിസ് അറസ്റ്റുചെയ്തു. എ.എസ്പി അരവിന്ദ് സുകുമാറിനു ലഭിച്ച രഹസ്യവിവരത്തെ തുടര്‍ന്ന് നഗരത്തിലെ സ്വകാര്യ ആശുപത്രി പരിസരത്തുനിന്നാണ് ഇയാളെ പിടികൂടിയത്. വിദ്യാര്‍ഥികളെയും സമ്പന്നരെയും ലക്ഷ്യമാക്കി മഹാരാഷ്ട്രയില്‍നിന്നാണ് ബ്രൗണ്‍ഷുഗര്‍ എത്തിക്കുന്നതെന്ന് പ്രതി പൊലിസിനോടു പറഞ്ഞു. കതിരൂര്‍ സി.ഐ പ്രതാപ്, എസ്.ഐമാരായ അഷ്‌റഫ്, ഹരീഷ് ഷാഡോ പൊലിസ് അംഗങ്ങളായ ശ്രീജേഷ്, സുജേഷ്, മീരജ്, രാജീവന്‍ എന്നിവരും സംഘത്തിലുണ്ടായിരുന്നു.

കഴിഞ്ഞ ദിവസമാണ് അമിത മയക്കുമരുന്ന് ഉപയോഗത്തെ തുടര്‍ന്ന് മുഴപ്പിലങ്ങാട് സ്വദേശിയായ യുവാവ് മരിച്ചത്. നേരത്തെ തലശ്ശേരിയില്‍ ലഹരി മരുന്നിന് അടിമയായിരുന്ന ഓട്ടോറിക്ഷാ ഡ്രൈവറും മരിച്ചിരുന്നു. റെയില്‍വേ സ്റ്റേഷന്‍ പരിസരത്തെ ഉപയോഗിക്കാത്ത ക്വാര്‍ട്ടേഴ്‌സ് ലഹരിമരുന്ന് സംഘത്തിന്റെ കേന്ദ്രമായി മാറിയിരിക്കുകയാണ്. കാടുമൂടിക്കിടക്കുന്ന ഇവിടം സാമൂഹിക പ്രവര്‍ത്തകര്‍ ശുചീകരിച്ചപ്പോള്‍ വിദ്യാര്‍ഥികളുടെ പാഠപുസ്തകങ്ങള്‍ ഉള്‍പ്പെടെയുള്ളവ കണ്ടെടുത്തിരുന്നു.