ഇംഫാല്‍: മണിപ്പൂരില്‍ സര്‍ക്കാരിനെ നിലനിര്‍ത്താന്‍ ബി.ജെ.പി ജനാധിപത്യത്തെ ഇല്ലാതാക്കുന്നെന്ന് കോണ്‍ഗ്രസ്. ബി.ജെ.പി സര്‍ക്കാരിനു പിന്തുണ പിന്‍വലിച്ചിരുന്ന എന്‍.പി.പിയുടെ നാല് എം.എല്‍.എമാരെ ബി.ജെ.പിയുടെ നേതൃത്വത്തില്‍ ഡല്‍ഹിയിലെത്തിച്ച് ചര്‍ച്ച നടത്തിയതിനെ തുടര്‍ന്ന് ഇവര്‍ തീരുമാനം പിന്‍വലിച്ചിരുന്നു. ഇതിനു പിന്നാലെയാണ് കോണ്‍ഗ്രസിന്റെ പ്രതികരണം.

സര്‍ക്കാരിനെ നിലനിര്‍ത്താന്‍ വൃത്തികെട്ട എല്ലാ വഴികളും ബി.ജെ.പി ഉപയോഗിക്കുന്നുണ്ടെന്നു കോണ്‍ഗ്രസ് വക്താവ് അജയ് മാക്കന്‍ ഡല്‍ഹിയില്‍ പറഞ്ഞു. സി.ബി.ഐയെ ഉപയോഗിച്ചുപോലും ബി.ജെ.പി ഭരണം നിലനിര്‍ത്താന്‍ ശ്രമിക്കുന്നുണ്ടെന്നാണ് കോണ്‍ഗ്രസിന്റെ ആരോപണം. ഇതിനു കൂട്ടിനില്‍ക്കുന്ന സ്പീക്കര്‍ക്കെതിരേയും കോണ്‍ഗ്രസ് ആരോപണമുയര്‍ത്തുന്നുണ്ട്.

നേരത്തെ, ബി.ജെ.പി സര്‍ക്കാര്‍ ന്യൂനപക്ഷമാകുകയും കോണ്‍ഗ്രസ് പ്രത്യേക നിയമസഭാ സമ്മേളനം വിളിച്ചുചേര്‍ക്കണമെന്ന് ആവശ്യപ്പെടുകയും ചെയ്തതിനു പിന്നാലെ കോണ്‍ഗ്രസ് നേതാക്കള്‍ക്കെതിരായ അഴിമതിക്കേസുകള്‍ അന്വേഷിക്കുന്നതിനും ഇവരെ ചോദ്യം ചെയ്യുന്നതിനും സി.ബി.ഐ സംഘം സംസ്ഥാനത്തെത്തിയത് വിവാദമായിരുന്നു. ഇതിനു പിന്നാലെയാണ് ബി.ജെ.പി നാല് എന്‍.പി.പി എം.എല്‍.എമാരെ ഡല്‍ഹിയിലെത്തിച്ചിരുന്നത്. ബി.ജെ.പിക്കെതിരേ സമാന ആരോപണവുമായി തൃണമൂല്‍ കോണ്‍ഗ്രസ് എം.എല്‍.എയും രംഗത്തെത്തിയിട്ടുണ്ട്.