മഞ്ചേരി: പ്രതിപക്ഷ അംഗങ്ങളുടെ ചെയ്തികളാണ് തീര്‍ത്തും ജനാധിപത്യപരമായ രീതിയില്‍ നടക്കേണ്ട കൗണ്‍സില്‍ യോഗ നടപടികളെ കൈയാങ്കളിയിലെത്തിച്ചതെന്ന് മഞ്ചേരി നഗരസഭാധ്യക്ഷ വി.എം സുബൈദ പ്രതികരിച്ചു. യോഗത്തില്‍ ബഹളം ഉണ്ടാക്കിയപ്പോള്‍ ഇരിക്കാന്‍ ആവശ്യപ്പെട്ടിട്ടും കൂടുതല്‍ പ്രകോപനപരമായ രീതി സ്വീകരിച്ചതുമൂലമാണ് ഇത്തരം നിര്‍ഭാഗ്യകരമായ സംഭവങ്ങളുണ്ടായത്.
ഇതു ജനങ്ങളെ പരിഹസിക്കുന്നതിനു തുല്യമാണ്. യോഗങ്ങളില്‍ പങ്കെടുക്കാതെ വിമര്‍ശനം മാത്രം ഉന്നയിക്കുന്ന പ്രതിപക്ഷത്തിന്റെ ശൈലി ശരിയല്ല. കൗണ്‍സിലിന്റെ നടപടിക്രമങ്ങള്‍ പോലും കൃത്യമായി മനസിലാക്കാതെയാണ് പ്രതിപക്ഷം മുന്നോട്ടുപോവുന്നത്.മഞ്ചേരിയില്‍ വികസനപ്രവര്‍ത്തനങ്ങള്‍ കാഴ്ച്ചവച്ചു മുന്നോട്ടുപോവുന്ന നഗരസഭയെ അപകീര്‍ത്തിപ്പെടുത്താനുള്ള ശ്രമങ്ങള്‍ പ്രതിപക്ഷ കൗണ്‍സിലര്‍മാരുടെ ഭാഗത്തുനിന്നുണ്ടാവുന്നത് നിര്‍ഭാഗ്യകരമാണെന്നും അവര്‍ പറഞ്ഞു.
അക്രമ സംഭവങ്ങളില്‍ പരുക്കേറ്റ് മഞ്ചേരി സ്വകാര്യ ആശുപത്രിയില്‍ ചികിത്സ തേടിയ ഉപാധ്യക്ഷന്‍ വി.പി ഫിറോസിനെയും മഞ്ചേരി മെഡിക്കല്‍ കോളജില്‍ ചികിത്സതേടിയ പ്രതിപക്ഷ നേതാവ് അഡ്വ. കെ. ഫിറോസ് ബാബുവിനേയും നഗരസഭാധ്യക്ഷ സന്ദര്‍ശിച്ചു.