ആലപ്പുഴ: നെഹ്രുട്രോഫി ജലമേളയുടെ ടിക്കറ്റുകളുടെ അനധികൃത വില്‍പ്പന തടയാന്‍ ഹോളോഗ്രാം മുദ്രയുള്ള ടിക്കറ്റുകള്‍ പുറത്തിറക്കി. 66 ാമത് ജലമേള ഓഗസ്റ്റ് 11-ാം തിയതി നടക്കാനിരിക്കെ മുന്‍ വര്‍ഷങ്ങളില്‍ നിന്ന് വ്യത്യസ്തമായി സി. ഡിറ്റ് രൂപകല്‍പ്പന ചെയ്ത പ്രത്യേക ഹോളോഗ്രാം മുദ്ര പതിപ്പിച്ച ടിക്കറ്റുകളാണ് വില്‍പ്പനയ്ക്ക് തയാറാക്കിയിട്ടുള്ളത്. ജൂലൈ ആദ്യവാരം മുതല്‍ ടിക്കറ്റുകള്‍ എല്ലാ സര്‍ക്കാര്‍ ഓഫിസുകളിലും ലഭ്യമാകും. ഓഫിസ് മേധാവികള്‍ ഹോളോഗ്രാം മുദ്ര പതിപ്പിച്ച ടിക്കറ്റുകള്‍ മാത്രമേ വില്‍ക്കുവാന്‍ പാടുള്ളൂ. ടിക്കറ്റുകള്‍ വാങ്ങുന്നവര്‍ ഹോളോഗ്രാം മുദ്രയുള്ള ടിക്കറ്റുകള്‍ നോക്കിവാങ്ങേണ്ടതാണ്. നെഹ്‌റുട്രോഫി ജലമേളയുടെ ടിക്കറ്റുകളില്‍ ഹോളോഗ്രാം മുദ്ര പതിപ്പിച്ചുകൊണ്ട് എന്‍.ടി.ബി.ആര്‍ സെക്രട്ടറി സബ് കലക്ടര്‍ കൃഷ്ണ തേജ ഉദ്ഘാടനം ചെയ്തു.