വാടാനപ്പള്ളി : ഏങ്ങണ്ടിയൂര്‍ ഗ്രാമത്തിലെ യുവാക്കളുടെ കായിക ക്ഷമത വര്‍ധിപ്പിക്കുന്നതിനും വോളിബോള്‍ പ്രതിഭകളെ വാര്‍ത്തെടുക്കുന്നതിനും വേണ്ടി 'കോച്ചേഴ്‌സ് ക്ലിനിക്ക് 'പരിശീലന ക്യാംപ് സംഘടിപ്പിച്ചു.
2018-19 സാമ്പത്തിക വര്‍ഷത്തെ പദ്ധതിയിലുള്‍പ്പെടുത്തി നടപ്പിലാക്കുന്ന 'വോളീഗ്രാമം' പദ്ധതിയുടെ ഭാഗമായി പരിശീലകര്‍ക്ക് മികച്ച പരിശീലനം നല്‍കുന്നതിനും പദ്ധതിയുടെ ഉദ്ദേശ ലക്ഷ്യങ്ങള്‍ വിശദീകരിക്കുന്നതിനും വേണ്ടിയാണ് പഞ്ചായത്ത് ഹാളില്‍ ക്യാംപ് സംഘടിപ്പിച്ചത്.
ഗ്രാമപഞ്ചായത്ത് പ്രസിഡന്റ് ഉദയ് തോട്ടപ്പുള്ളി ഉദ്ഘാടനം ചെയ്തു. വൈസ് പ്രസിഡന്റ് സി.ബി ഭാരതി അധ്യക്ഷയായി.
വോളിബോള്‍ അസോസിയേഷന്‍ സംസ്ഥാന കൗണ്‍സില്‍ അംഗം കെ.ആര്‍ സാംമ്പശിവന്‍, മുന്‍ ഗ്രാമപഞ്ചായത്ത് പ്രസിഡന്റ് കെ.വി അശോകന്‍, ബ്ലോക്ക് പഞ്ചായത്തംഗം എന്‍.ആര്‍ ഗണേശ്, ഗ്രാമ പഞ്ചായത്തംഗങ്ങളായ ഇര്‍ഷാദ് കെ. ചേറ്റുവ, സിന്ധു സന്തോഷ്, പി.വി സുരേഷ് സംസാരിച്ചു. ഇന്ത്യന്‍ വോളിബോള്‍ പരിശീലകന്‍ പി.ശിവകുമാര്‍ ക്ലാസെടുത്തു. പഞ്ചായത്ത് വാര്‍ഷിക പദ്ധതിയില്‍ ഒരു ലക്ഷം രൂപ ചിലവഴിച്ചാണ് ആദ്യഘട്ട വോളീഗ്രാമം പദ്ധതി നടപ്പിലാക്കുന്നത്. ഇതിന്റെ ഭാഗമായി 16 വാര്‍ഡുകളെ കേന്ദ്രീകരിച്ച് മികച്ച പരിശീലകരുടെ നേതൃത്വത്തില്‍ പരിശീലന ക്യാംപുകള്‍ സംഘടിപ്പിക്കുന്നതിലൂടെ വാര്‍ഡ് തല ടീമുകളും വാര്‍ഡ് ടീമുകളിലെ മികച്ച കളിക്കാരെ കണ്ടെത്തി പഞ്ചായത്ത് തല ടീമും തെരഞ്ഞെടുക്കും. ജില്ലാ സ്‌പോര്‍ട്ട്‌സ് കൗണ്‍സിലിന്റെ സഹകരണത്തോടെയാണ് പദ്ധതി നടപ്പിലാക്കുന്നത്.