ന്യൂഡല്‍ഹി: 2019 ലെ ലോക്‌സഭാ തെരഞ്ഞെടുപ്പില്‍ ബി.ജെ.പി യുമായുള്ള സഖ്യം തുടരുമെന്ന് ജെ.ഡി.യു പ്രഖ്യാപിച്ചു. എന്നാല്‍ വിവിധ സംസ്ഥാനങ്ങളിലേക്ക് നടക്കുന്ന തെരഞ്ഞെടുപ്പില്‍ ഒറ്റയ്ക്ക് മത്സരിക്കുമെന്നും പാര്‍ട്ടി അറിയിച്ചു. നിതീഷ് കുമാറിന്റെ നേതൃത്വത്തില്‍ ഇന്നലെ ചേര്‍ന്ന ദേശീയ എക്‌സിക്യൂട്ടീവ് യോഗത്തിനുശേഷം പാര്‍ട്ടി വക്താവ് കെ.സി ത്യാഗിയാണ് ഇക്കാര്യം മാധ്യമങ്ങളെ അറിയിച്ചത്.
ലോക്‌സഭാ തെരഞ്ഞെടുപ്പില്‍ എത്ര സീറ്റ് മത്സരിക്കാന്‍ ലഭിക്കും എന്നതിനെ സംബന്ധിച്ചായിരിക്കും തുടര്‍ന്നു വരുന്ന ചര്‍ച്ചകളില്‍ തീരുമാനം സ്വീകരിക്കുക. ബി.ജെ.പി ദേശീയ അധ്യക്ഷന്‍ അമിത് ഷായുമായി ഇക്കാര്യത്തില്‍ ചര്‍ച്ചകള്‍ നടത്തും. വ്യാഴാഴ്ച ബിഹാറില്‍ അദ്ദേഹം സന്ദര്‍ശനം നടത്തുന്നുണ്ട്. അപ്പോഴാണ് ചര്‍ച്ച നടത്തുകയെന്നും വക്താവ് അറിയിച്ചു. മിനിമം 17 സീറ്റുകളിലെങ്കിലും മത്സരിക്കാനുള്ള തീരുമാനമാണ് പാര്‍ട്ടി എടുത്തിട്ടുള്ളതെന്ന് സൂചനയുണ്ട്.