കയ്പമംഗലം: ദേശീയപാത 66ല്‍ നിയന്ത്രണം തെറ്റിയ ബസ് മരത്തിലിടിച്ച് യാത്രക്കാരായ എട്ടുപേര്‍ക്ക് പരുക്ക്. ആരുടെയും പരുക്ക് സാരമുള്ളതല്ല.
ഇന്നലെ വൈകിട്ട് നാല് മണിയോടെ മതിലം പുതിയകാവ് വളവിലാണ് അപകടമുണ്ടായത്. മതിലകം കളരിപ്പറമ്പ് സ്വദേശി മണ്ടത്തറ അനിലിന്റെ ഭാര്യ മിനി (43), മണ്ടത്തറ വിഷ്ണുവിന്റെ ഭാര്യ ദേവിക (25), കയ്പമംഗലം സ്വദേശി കാതിക്കോടത്ത് സുമ (34), മകള്‍ ദേവനന്ദ(അഞ്ച്), മതിലകം സ്വദേശികളായ അസ്‌ലം (15), ഹമീദ് (64), അപര്‍ണ(45), പെരിഞ്ഞനം കൊറ്റംകുളം സ്വേദശി അഥീന വര്‍ഷ (17) എന്നിവര്‍ക്കാണ് പരുക്കേറ്റത്.
പരുക്കേറ്റവരെ മതിലകത്തെയും കൊടുങ്ങല്ലുരിലേയും സ്വകാര്യ ആശുപത്രികളില്‍ പ്രവേശിപ്പിച്ചു. കൊടുങ്ങല്ലൂരില്‍ നിന്നും ഗുരുവായൂരിലേയ്ക്ക് പോവുകയായിരുന്ന അയിഷ ബസാണ് അപകടത്തില്‍പെട്ടത്. പുതിയകാവ് വളിലെത്തിയപ്പോള്‍ പെട്ടന്ന് ബ്രേക്ക് നഷ്ടപ്പെട്ടതാണ് അപകടത്തിന് കാരണമെന്ന് പറയുന്നു. വളവ് വളക്കാനാകാതെ നേരെ പോയ ബസ് മരത്തിലും അടുത്തുള്ള പീടികമുറിയിലും ഇടിച്ചാണ് നിന്നത്.