മാള: കെ. കരുണാകരന്‍ സ്മാരക കമ്മ്യൂണിറ്റി ഹോസ്പിറ്റലില്‍ വൈകിട്ട് ആറു വരെ ചികിത്സ ആരംഭിച്ചു.
ഈ ആവശ്യം ഉന്നയിച്ച് സേവ് മാള ഗവണ്‍മെന്റ് ഹോസ്പിറ്റല്‍ കൂട്ടായ്മ പ്രസിഡന്റ് സലാം ചൊവ്വര, വൈസ് പ്രസിഡന്റ് ലോജനന്‍ അമ്പാട്ട്, സെക്രട്ടറി സി.ജെ സിജു, ജോ. സെക്രട്ടറി വി.എസ് അച്ഛ്യുതന്‍, ഹര്‍ഷാദ് കടവില്‍, വി.കെ ദില്‍ഷാദ് എന്നിവര്‍ കഴിഞ്ഞ മാസം തിരുവനന്തപുരത്ത് ചെന്ന് ആരോഗ്യമന്ത്രി ശൈലജ ടീച്ചര്‍ക്ക് നിവേദനം നല്‍കിയിരുന്നു.
ഇതിനെ തുടര്‍ന്ന് ചികിത്സാ സമയം ദീര്‍ഘിപ്പിക്കുന്നതിനുള്ള നടപടി സ്വീകരിക്കാമെന്ന് മന്ത്രി ഉറപ്പ് നല്‍കിയിരുന്നു.
എന്നാല്‍ ചില ഡോക്ടര്‍മാരുടെ ഇടപെടല്‍ മൂലം വൈകിട്ടുള്ള ഒ.പി ആരംഭിക്കുന്നത് വൈകിയതിനാല്‍ സേവ് കൂട്ടായ്മ പ്രസിഡന്റ് ജില്ലാ മെഡിക്കല്‍ ഓഫിസറെ നേരില്‍ കണ്ടു പരാതി നല്‍കി കാര്യങ്ങള്‍ ബോധിപ്പിച്ചു. ഇതിനെ തുടര്‍ന്നാണ് അടിയന്തരമായി വൈകിട്ട് ആറുവരെ ചികിത്സ സമയം കൂട്ടുന്നതിനായുള്ള ഉത്തരവ് ജില്ലാ മെഡിക്കല്‍ ഓഫിസര്‍ കഴിഞ്ഞ ദിവസം ആശുപത്രി സൂപ്രണ്ടിനു കൈമാറിയത്. കഴിഞ്ഞ ദിവസം മുതല്‍ വൈകിട്ടു ആറുവരെയുള്ള ഡോക്ടറുടെ സേവനം ആശുപത്രിയില്‍ ലഭ്യമാക്കി തുടങ്ങിയിട്ടുണ്ട്.