കൊല്‍ക്കത്ത: ബംഗാളിലെ ചെയിന്‍ കില്ലര്‍ എന്നറിയപ്പെടുന്ന, കൊലപാതക പരമ്പര കേസുകളിലെ പ്രതിക്ക് വിദ്യാര്‍ഥിയെ ബലാത്സംഗം ചെയ്ത് കൊലപ്പെടുത്തിയ കേസില്‍ വധശിക്ഷ. 38 കാരനായ കമറുസ്സമാന്‍ സര്‍ക്കാറിനെയാണ് ഈസ്റ്റ് ബുര്‍ദ്വാന്‍ ജില്ലാ സെഷന്‍സ് കോടതി വധശിക്ഷയ്ക്ക് വിധിച്ചത്. ഒന്‍പത് സ്ത്രീകളെ കൊലപ്പെടുത്തിയ കേസില്‍ പ്രതിയായ ഇയാള്‍ രണ്ടുസ്ത്രീകളെ ബലാത്സംഗം ചെയ്ത കേസിലും പ്രതിയാണ്. സ്‌കൂള്‍ വിദ്യാര്‍ഥിയെ ബലാത്സംഗം ചെയ്ത് കൊലപ്പെടുത്തിയ കേസിലാണ് കോടതി ഇയാളെ വധശിക്ഷയ്ക്ക് വിധിച്ചത്.
വൈദ്യുതി വകുപ്പില്‍ നിന്ന് മീറ്റര്‍ റീഡിങ് പരിശോധിക്കാന്‍ വന്ന ഉദ്യോഗസ്ഥന്‍ എന്ന വ്യാജേനയാണ് ഇയാള്‍ വീട്ടിലെത്തുന്നത്. ഇരകളെ സൈക്കിള്‍ ചങ്ങല ഉപയോഗിച്ച് ശ്വസം മുട്ടിച്ച് കൊലപ്പെടുത്തുകയായിരുന്നു പതിവ്. അതുകൊണ്ടുതന്നെ ചെയിന്‍ കില്ലര്‍ എന്നാണ് അറിയപ്പെടുന്നത്.
16 മുതല്‍ 90 വയസ് വരെ പ്രായമുള്ള സ്ത്രീകളെയാണ് ഇയാള്‍ ഇരകളാക്കിയിരുന്നത്. കൊലപാതകം നടത്തിയ വീടുകളില്‍ നിന്ന് മോഷണവും നടത്തിയിരുന്നു. അപൂര്‍വം ചില സ്ത്രീകള്‍ മാത്രമാണ് ഇയാളുടെ ആക്രമണത്തില്‍ നിന്ന് രക്ഷപ്പെട്ടത്. വീട്ടില്‍ ഒറ്റയ്ക്കാവുന്ന സ്ത്രീകളെയാണ് സര്‍ക്കാര്‍ ആക്രമിക്കാറ്. ജൂണ്‍ അവസാനമാണ് ഇയാള്‍ അറസ്റ്റിലാകുന്നത്.