കല്‍പ്പറ്റ: ബി.ജെ.പി അധ്യക്ഷന്‍ അമിത് ഷായ്ക്ക് വയനാടിനെക്കുറിച്ച് ഒന്നുമറിയില്ലെന്നും അതുകൊണ്ടാണ് വയനാടിനെ പാക്കിസ്താന്‍ എന്ന് വിളിച്ച് അപമാനിച്ചതെന്നും മുഖ്യമന്ത്രി പിണറായി വിജയന്‍. എല്‍.ഡി.എഫ് സ്ഥാനാര്‍ഥി പി.പി സുനീറിന്റെ തെരഞ്ഞെടുപ്പ് പ്രചാരണ യോഗത്തില്‍ സംസാരിക്കുകയായിരുന്നു അദ്ദേഹം.
കഴിഞ്ഞ ദിവസം വയനാടിനെ ആകെ അപമാനിച്ചുകൊണ്ടാണ് അമിത് ഷാ പ്രസംഗിച്ചത്. എന്തും വിളിച്ചുപറയാന്‍ കേമനായ ആളാണ് അമിത് ഷാ. വയനാട്ടിലെ യോഗം കണ്ടാല്‍ പാക്കിസ്താനിലെ യോഗമാണെന്ന് തോന്നുമെന്നാണ് പറയുന്നത്. വയനാടിനെപ്പറ്റി എന്തെങ്കിലും അദ്ദേഹത്തിനറിയാമോ വര്‍ഗീയ വിഷം തുപ്പുന്ന പ്രസംഗമാണ് അദ്ദേഹം നടത്തിയത്. ബ്രിട്ടിഷ് സാമ്രാജ്യത്തിനെതിരായ പോരാട്ടത്തില്‍ വയനാട് വഹിച്ച പങ്കിനെക്കുറിച്ച് വല്ല ഗ്രാഹ്യവും അമിത് ഷായ്ക്കുണ്ടോ. സ്വതന്ത്ര്യ സമര പോരാട്ടത്തില്‍ എന്തെങ്കിലുമൊരു പങ്കു വഹിച്ചിട്ടുണ്ടെങ്കിലല്ലേ അതേക്കുറിച്ച് അറിയാന്‍ കഴിയൂ, അതില്ലല്ലോ. വയനാട്ടില്‍ ബ്രിട്ടനെതിരായ പോരാട്ടത്തില്‍ പഴശ്ശിരാജയ്ക്ക് ഒപ്പം നിന്നത് വയനാട്ടിലെ കുറിച്യപ്പടയാണെന്ന് ആര്‍ക്കാണറിയാത്തത്.

സംസ്ഥാനത്തെ 20 മണ്ഡലങ്ങളിലെ ഒരു സ്ഥാനാര്‍ഥി മാത്രമാണ് രാഹുല്‍ഗാന്ധി. 20 മണ്ഡലത്തിലും നമുക്ക് യു.ഡി.എഫ് എതിരാളികള്‍ ഉണ്ട്. അതിലൊരാള്‍ മാത്രമാണ് രാഹുല്‍ ഗാന്ധി. 20 മണ്ഡലങ്ങളില്‍ ചിലതില്‍ കോണ്‍ഗ്രസിന് ആര്‍.എസ്.എസ്, ബി.ജെ.പി സഹായം ലഭിക്കുന്നത് പരസ്യമായ രഹസ്യമാണ്. എല്ലായിടത്തും നാം ഇതേ ശക്തികളെത്തന്നെയാണ് നേരിടുന്നത്. വയനാട്ടിലും നാം ശക്തമായ മത്സരം കാഴ്ചവയ്ക്കണം.

വിജയിക്കാന്‍ തന്നെയാണ് എല്‍.ഡി.എഫ് മത്സരിക്കുന്നത്. അക്കാര്യത്തില്‍ ഇടതുപക്ഷത്തിനു ലഭിച്ച നല്ല സ്ഥാനാര്‍ഥി തന്നെയാണ് പി.പി സുനീര്‍.
രാഹുല്‍ ഗാന്ധിയുടെ സ്ഥാനാര്‍ഥിത്വം ആലോചനയില്‍ വരുമ്പോള്‍ തന്നെ തങ്ങള്‍ പറഞ്ഞിരുന്നു എന്തു സന്ദേശമാണ് കോണ്‍ഗ്രസ് ഇതിലൂടെ നല്‍കാന്‍ ശ്രമിക്കുന്നതെന്ന്. എല്‍.ഡി.എഫിനെ നേരിടാനാണ് നിങ്ങള്‍ വരുന്നത്. ഇടതുപക്ഷമാണ് ഇന്ന് രാജ്യത്ത് തകര്‍ക്കപ്പെടേണ്ട ശക്തിയെന്ന സന്ദേശം നിങ്ങള്‍ നല്‍കുന്നു.
വര്‍ഗീയതയ്‌ക്കെതിരേ ഉറച്ച നിലപാടെടുത്ത് ഇന്ന് പോരാടുന്നത് ഇടതുപക്ഷ മാണ്. പിണറായി പറഞ്ഞു.