ലണ്ടന്‍: യുവേഫ യൂറോപ്പ ലീഗ് ചാംപ്യന്‍ഷിപ്പില്‍ ആഴ്‌സനലിനും ചെല്‍സിക്കും ജയം. എതിരില്ലാത്ത രണ്ട് ഗോളുകള്‍ക്ക് ആഴ്‌സനല്‍ നാപോളിയെയാണ് തകര്‍ത്തത്. 14-ാം മിനുട്ടില്‍ ആരോണ്‍ റംസിയാണ് ആഴ്‌സനലിന്റെ ആദ്യ ഗോള്‍ നേടിയത്. 25-ാം മിനുട്ടില്‍ കൗലിബലിയുടെ സെല്‍ഫ് ഗോളാണ് ആഴ്‌സനലിന്റെ ലീഡ് ഉയര്‍ത്തിയത്.

ആഴ്‌സനലിന്റെ ഹോം ഗ്രൗണ്ടില്‍ നടന്ന ആദ്യ പാദ ക്വാര്‍ട്ടര്‍ ഫൈനലിലാണ് ആഴ്‌സനല്‍ ജയം സ്വന്തമാക്കിയത്. രണ്ടാം പാദം 19ന് നടക്കും. മറ്റൊരു മത്സരത്തില്‍ എതിരില്ലാത്ത ഒരു ഗോളിന് ചെല്‍സി സ്‌ലാവിയ പ്രാഹയെ പരാജയപ്പെടുത്തി. 86-ാം മിനുട്ടില്‍ മാര്‍ക്കോ അലോന്‍സോയാണ് ചെല്‍സിയുടെ വിജയ ഗോള്‍ നേടിയത്.

രണ്ടാം പാദം ചെല്‍സിയുടെ ഹോം ഗ്രൗണ്ടില്‍ 19ന് നടക്കും. മറ്റൊരു മത്സരത്തില്‍ ബെന്‍ഫിക്ക 4-2 എന്ന സ്‌കോറിന് ഐന്‍ട്രാക്ടിനെ പരാജയപ്പെടുത്തി. ജോ ഫെലിക്‌സിന്റെ ഹാട്രിക്കിന്റെ പിന്‍ബലത്തിലായിരുന്നു ബെന്‍ഫിക്ക മികച്ച ജയം സ്വന്തമാക്കിയത്.
21, 43, 54 മിനുട്ടുകളിലായിരുന്നു ഫെലിക്‌സിന്റെ ഹാട്രിക്. 50-ാം മിനുട്ടില്‍ റൂബന്‍ ഡയസും ഗോള്‍ കണ്ടെത്തി. 3-1 എന്ന സ്‌കോറിന് വലന്‍സിയ വിയ്യാറയലിനെ പരാജയപ്പെടുത്തി.