ഇരിങ്ങാലക്കുട : കല്ലട ബാറില്‍ വച്ചു കഴിഞ്ഞ നാലിന് രാത്രി യുവാവിനെ ക്രൂരമായി മര്‍ദിച്ച ഗുണ്ടാസംഘാംഗങ്ങളായ കടുക് എന്നറിയപെടുന്ന പൊറത്തുശ്ശേരി ദേശത്ത് മണപ്പെട്ടി പ്രസാദ് , കടുപ്പശേരി തളിയകാട്ടില്‍ ഉദയ സൂര്യന്‍ , ആനന്ദപുരം കാനാട്ട് വീട്ടില്‍ മോഹനന്‍ എന്നിവരെ ഇരിങ്ങാലക്കുട പൊലിസ് പിടികൂടി.
ഇരിങ്ങാലക്കുടയിലെ ബാറിലെ വാഹനം പാര്‍ക്ക് ചെയ്ത സമയം ദേഹത്ത് മുട്ടിയതിനെ തുടര്‍ന്നുണ്ടായ തര്‍ക്കമാണ് അടിപിടിയില്‍ കലാശിച്ചത്.
ഗുണ്ടാ ആക്രമണത്തില്‍ പരുക്കു പറ്റിയ രഞ്ജിത്തിന്റെ അഞ്ച് പല്ലുകള്‍ നഷ്ടപെടുകയും ശരീരത്തില്‍ മുറിവുകള്‍ പറ്റുകയുമുണ്ടായി. പരുക്ക് പറ്റിയ രഞ്ജിത്ത് ഇരിങ്ങാലക്കുട സര്‍ക്കാര്‍ ആശുപത്രിയിലെ തീവ്രപരിചരണ വിഭാഗത്തില്‍ ദിവസങ്ങളോളം ചികിത്സയിലായിരുന്നു. ഇരിങ്ങാലക്കുട പൊലിസില്‍ പരാതി നല്‍കിയതറിഞ്ഞ് ഒളിവില്‍ പോയ ഗുണ്ടാസംഘങ്ങളെ പിടികൂടുന്നതിന് പ്രത്യേക അന്വേഷണ സംഘം രൂപീകരിച്ചിരുന്നു.
നഗരത്തിലെ വിവിധ സ്ഥാപനങ്ങളില്‍ സ്ഥാപിച്ച സി.സി.ടി.വി കാമറകള്‍ പരിശോധന നടത്തിയതില്‍ നിന്നുമാണ് പൊലിസിന് പ്രതികളെ കുറിച്ചുള്ള സൂചന ലഭിച്ചത്. കടുക് പ്രസാദിന് ഇരിങ്ങാലക്കുട പൊലിസ് സ്റ്റേഷനില്‍ അഞ്ചോളം അടിപിടി കേസുകള്‍ നിലവിലുണ്ട്.