കൊണ്ടോട്ടി: ദോഹയില്‍ നിന്നെത്തിയ യാത്രക്കാരന്‍ ഒളിപ്പിച്ചു കടത്തിയ രണ്ടു കിലോ സ്വര്‍ണവുമായി പുറത്ത് കടക്കാന്‍ ശ്രമിച്ച കരിപ്പൂര്‍ വിമാനത്താവളത്തിലെ കരാര്‍ തൊഴിലാളി പിടിയില്‍. വിമാനത്താവളത്തിലെ എ.ടി.എസ്.എല്‍ ഗ്രൗണ്ട് ഹാന്റ്‌ലിങ് വിഭാഗത്തിലെ കരാര്‍ തൊഴിലാളിയായ മലപ്പുറം മമ്പുറം മുഖംവീട്ടില്‍ എം.വി സിദ്ദീഖില്‍നിന്നാണ് രണ്ട് കിലോ സ്വര്‍ണം ഡയറക്ടറേറ്റ് ഓഫ് റവന്യൂ ഇന്റലിജന്‍സ്(ഡി.ആര്‍.ഐ) സംഘം പിടികൂടിയത്.
ബുധനാഴ്ച പുലര്‍ച്ചെ 1.15ന് വിമാനത്താവളത്തിലെ അന്താരാഷ്ട്ര ടെര്‍മിനല്‍ വഴി സിദ്ദീഖ് പുറത്തിറങ്ങുമ്പോഴാണ് ഡി.ആര്‍.ഐ സംഘം ഇയാളെ കസ്റ്റഡിയിലെടുത്തത്. തുടര്‍ന്ന് നടത്തിയ പരിശോധനയിലാണ് 58.70 ലക്ഷം രൂപ വില വരുന്ന സ്വര്‍ണം കണ്ടെത്തിയത്. മൊബൈല്‍ ഫോണിന്റെ കവറിനകത്താക്കി പാന്റ്‌സിന്റെ പോക്കറ്റിലായിരുന്നു സ്വര്‍ണം ഒളിപ്പിച്ചിരുന്നത്. ഓരോ കിലോഗ്രാം വീതമുള്ള രണ്ട് സ്വര്‍ണകട്ടികളാണ് ഇയാളില്‍നിന്ന് കണ്ടെടുത്തത്.
വിമാനത്താവളത്തിലെ എമിഗ്രേഷന്‍ ഹാളിലെ ടോയ്‌ലറ്റില്‍നിന്നാണ് സ്വര്‍ണം ലഭിച്ചതെന്ന് സിദ്ദീഖ് ചോദ്യം ചെയ്യലില്‍ പറഞ്ഞു. ദോഹയില്‍നിന്നുള്ള എയര്‍ഇന്ത്യ എക്‌സ്പ്രസില്‍ കരിപ്പൂരിലെത്തിയ യാത്രക്കാരനാണ് ഇവിടെ സ്വര്‍ണം ഒളിപ്പിച്ചതെന്ന് സംശയിക്കുന്നു.
യാത്രക്കാരന്‍ ടോയ്‌ലറ്റില്‍ ഒളിപ്പിച്ച സ്വര്‍ണം കരാര്‍ തൊഴിലാളി വഴി പുറത്തേക്ക് കൊണ്ടുവരാനായിരുന്നു ശ്രമമെന്ന് കരുതുന്നു. യാത്രക്കാരനെ കണ്ടത്താനായിട്ടില്ല. കരിപ്പൂരില്‍ നേരത്തേയും കരാര്‍ തൊഴിലാളികളും വിമാന കമ്പനി ജീവനക്കാരും സ്വര്‍ണക്കടത്തിന് സഹായികളായി പ്രവര്‍ത്തിച്ചതിന് പിടിയിലായിട്ടുണ്ട്.