കോയമ്പത്തൂര്‍: മലബാര്‍ സിമന്റ്‌സ്‌ മുന്‍ കമ്പനി സെക്രട്ടറി ശശീന്ദ്രനും രണ്ടുമക്കളും ജീവനൊടുക്കിയതിനു പിന്നാലെ അദ്ദേഹത്തിന്റെ ഭാര്യ ടീന (52)യും മരിച്ചു. കോയമ്പത്തൂരിലെ കോവൈ ആശുപത്രിയില്‍ ചികിത്സയിലിരിക്കെയാണ് മരണം. മരണത്തില്‍ ദുരൂഹതയുണ്ടെന്ന് ബന്ധുക്കള്‍ ആരോപിച്ചു.

വൃക്ക സംബന്ധമായ അസുഖത്തെ തുടര്‍ന്ന് മൂന്നു ദിവസം മുന്‍പാണ് ടീനയെ ആശുപത്രിയില്‍ പ്രവേശിപ്പിച്ചത്. 2011 ജനുവരി 24നാണ് ശശീന്ദ്രനും രണ്ടു മക്കളും വീട്ടില്‍ ജീവനൊടുക്കിയ നിലയില്‍ കാണപ്പെട്ടത്. പ്രത്യേക പൊലിസ് സംഘം അന്വേഷണം നടത്തിയെങ്കിലും ആത്മഹത്യയാണോ കൊലപാതകമാണോയെന്ന് തെളിയിക്കാനായിരുന്നില്ല.

തുടര്‍ന്ന് സി.ബി.ഐ അന്വേഷണം ആവശ്യപ്പെട്ട് ടീന ഹൈക്കോടതിയെ സമീപിച്ചിരുന്നു. കേസ് കോടതി സി.ബി.ഐയ്ക്ക് കൈമാറുകയും ചെയ്തു. അന്വേഷണം നടന്നുവരുന്നതിനിടെയാണ് ടീനയുടെ മരണം.