അബ്ദുസ്സലാം കൂടരഞ്ഞി 

മക്ക: ഈ വര്‍ഷത്തെ വിശുദ്ധ ഹജ്ജ് കര്‍മത്തിനായി ആളുകളെ തെരഞ്ഞെടുത്തത് തീര്‍ത്തും സുതാര്യമായിട്ടായിരുന്നുവെന്നും നേതാക്കളോ ഉത്തരവാദപ്പെട്ട മുതിര്‍ന്ന ഉദ്യോഗസ്ഥരോ ഹജ്ജില്‍ പങ്കെടുക്കില്ലെന്നും സഊദി ഹജ്ജ്, ഉംറ മന്ത്രാലയം. ഈ വര്‍ഷത്തെ ഹജ്ജ് തീര്‍ഥാടകരില്‍ 70 ശതമാനം പേര്‍ വിദേശികളാണെന്നും നയതന്ത്ര ഉദ്യോഗസ്ഥരെയോ വിദേശ രാജ്യങ്ങളുടെ പ്രതിനിധികളെയോ സഊദിയില്‍ കഴിയുന്ന വിദേശികളുടെ കൂട്ടത്തില്‍ പെട്ട വിശിഷ്ടരെയോ പ്രമുഖരെയോ ഹജ്ജിന് തെരഞ്ഞെടുത്തിട്ടില്ലെന്നും ഹജ്ജ് ഉംറ മന്ത്രാലയം വ്യക്തമാക്കി. ഇത്തവണത്തെ ഹജ്ജിന് ആര്‍ക്കും പ്രത്യേക ഇളവ് നല്‍കേണ്ടതില്ലെന്ന തീരുമാനമാണ് തിരുഗേഹങ്ങളുടെ സേവകന്‍ സല്‍മാന്‍ രാജാവ് ആദ്യമായി കൈക്കൊണ്ടതെന്ന് മന്ത്രി ഡോ. മുഹമ്മദ് സ്വാലിഹ് ബിന്‍തന്‍, ഡെപ്യൂട്ടി മന്ത്രി അബ്ദുല്‍ ഫത്താഹ് ബിന്‍ സുലൈമാന്‍ മുശാത്ത് എന്നിവര്‍ പറഞ്ഞു. 

അതേസമയം, പുണ്യസ്ഥലങ്ങളില്‍ സേവനമനുഷ്ഠിക്കുന്ന തൊഴിലാളികള്‍ക്ക് കൊവിഡ് പരിശോധന നടത്തുന്നുണ്ട്. ഇസ്‌ലാമികകാര്യ മന്ത്രാലയമാണ് ആരോഗ്യ വകുപ്പുമായി സഹകരിച്ച് കൊറോണ വൈറസ് പരിശോധനകള്‍ നടത്തുന്നത്. മുസ്ദലിഫയിലെ അല്‍ മശ്അറുല്‍ഹറാം മസ്ജിദില്‍ നിയോഗിക്കുന്ന തൊഴിലാളികള്‍ക്കാണ് ആരോഗ്യ മന്ത്രാലവുമായി സഹകരിച്ച് ഇസ്‌ലാമികകാര്യ മന്ത്രാലയം ആദ്യമായി പി.സി.ആര്‍ പരിശോധനകള്‍ നടത്തിയത്.