ന്യൂഡല്‍ഹി: ആരാധനയൊക്കെ ആവാം. എന്നാല്‍ ആരാധന അതിരു കവിഞ്ഞാലോ. ഇതാണ് യു.പിയിലെ മീററ്റിലെ സ്വകാര്യ സ്‌കൂൡ സംഭവിച്ചിരിക്കുന്നത്. യു.പി മുഖ്യമന്ത്രി യോഗി ആദിത്യനാഥിനോടാണ് ആരാധന.

മുഖ്യമന്ത്രിയുടെ സ്‌റ്റൈലില്‍ മുടി വെട്ടിക്കണമെന്ന് സ്‌കൂളിലെ വിദ്യാര്‍ഥികളോട് ആവശ്യപ്പെട്ടു കളഞ്ഞു സ്‌കൂള്‍ അധികൃതര്‍. അനുസരിക്കാത്തവരെ സ്‌കൂളില്‍ നിന്ന് പുറത്താക്കുമെന്നും താക്കീതു ചെയ്തു. സ്‌കൂളില്‍ മാംസാഹാരത്തിന് വിലക്കേര്‍പെടുത്തിയതായും പരാതിയുണ്ട്.

ഏതായാലും സ്‌കൂള്‍ അധികൃതരുടെ നടപടിക്കെതിരെ ശക്തമായ എതിര്‍പ്പുമായി രക്ഷിതാക്കള്‍ രംഗത്തെത്തി. പ്രതിഷേധക്കാര്‍ക്കെതിരെ പൊലിസ് ഇടപെടലുണ്ടായെന്നാണ് റിപ്പോര്‍ട്ട്.

അതേ സമയം, വാര്‍ത്ത സകൂള്‍ അധികൃതര്‍ നിഷേധിച്ചു. തങ്ങളുടെ ഭാഗത്തു നിന്ന് ഇത്തരത്തിലൊരു നീക്കവും ഉണ്ടായിട്ടില്ലെന്ന് സ്‌കൂള്‍ മാനേജര്‍ പ്രതികരിച്ചു. മാന്യമായ വസ്ത്രം ധരിക്കാനും വൃത്തിയായി മുടി വെട്ടാനുമാണ് കുട്ടികളോട് ആവശ്യപ്പെട്ടത്. സ്‌കൂളിലെ അച്ചടക്കം ഉറപ്പു വരുത്താനാണിത്. മാംസാഹാരം എക്കാലത്തും പ്രശ്‌നം സൃഷ്ടിക്കുന്ന ഒന്നാണ്. ഇതിന് സാമുദായിക വര്‍ണം നല്‍കുന്നതാണ് ഖേദകരം- മാനേജര്‍ പറഞ്ഞു.

യോഗി ആദിത്യനാഥ് അധികാരമേറ്റ ശേഷം സ്‌കൂള്‍ അവധി ദിനങ്ങള്‍ വെട്ടിക്കുറച്ചതടക്കം വിദ്യാഭ്യസ മേഖലയില്‍ നിരവധി പരിഷ്‌കരണങ്ങള്‍ നടപ്പാക്കിയിരുന്നു. പ്രമുഖരുടെ ജന്മ ദിനങ്ങളില്‍ അവധി നല്‍കുന്നതിനു പകരം അവരെ കുറിച്ച് കുട്ടികള്‍ക്ക് രണ്ടു മണിക്കൂര്‍ ബോധവത്ക്കരണം നല്‍കണമെന്നതായിരുന്നു ഒരു നിര്‍ദ്ദേശം.