ഏറ്റുമാനൂര്‍: കെവിന്‍ കൊലപാതകകേസില്‍ കോടതിയില്‍ പുതിയ വെളിപ്പെടുത്തലുകളുമായി പ്രതിഭാഗം. കെവിന്റെ ഭാര്യ നീനുവിന് മാനസികരോഗമുണ്ടെന്ന് പറഞ്ഞിരുന്നതിന് പിന്നാലെ ഇവരുടെ കുടുംബത്തിലെ ഒട്ടേറെ പേര്‍ മനോരോഗികളാണെന്ന വെളിപ്പെടുത്തലാണ് പ്രതിഭാഗം അഭിഭാഷകന്‍ ഇന്നലെ ഏറ്റുമാനൂര്‍ ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി മുന്‍പാകെ നടത്തിയത്. 

നീനുവിന്റെ അമ്മ രഹ്ന മാനസികരോഗിയാണെന്ന് കേസിന്റെ തുടക്കത്തിലേ വാദമുണ്ടായിരുന്നു. രഹ്നയുടെ അമ്മയും അപ്പൂപ്പനും മറ്റൊരു ബന്ധുവും മാനസികരോഗികളാണെന്ന് വാദിച്ച പ്രതിഭാഗം അഭിഭാഷകന്‍ ഇവരില്‍ മൂന്ന് പേരുടെ രേഖകളും കോടതിയില്‍ ഹാജരാക്കി. രഹ്നയെയും അമ്മയെയും ചികിത്സിച്ച പുനലൂരിലെ ഒരു ആശുപത്രിയില്‍ നിന്നുള്ള ചികിത്സാരേഖകളാണ് ഹാജരാക്കിയത്.രഹ്നയുടെ അടുത്ത ബന്ധുവിനെ തിരുവനന്തപുരം പേരൂര്‍ക്കടയില്‍ ചികിത്സിച്ചതിന്റെ രേഖകളും ഹാജരാക്കി. നീനുവിനെ കൗണ്‍സിലിങ്ങിന് വിധേയയാക്കിയതായി തിരുവനന്തപുരത്തെ ഡോ.വൃന്ദ നേരത്തെ കോടതിയില്‍ റിപ്പോര്‍ട്ട് സമര്‍പ്പിച്ചിരുന്നു. രഹ്നയുടെ ഒരു സഹോദരന്‍ ആത്മഹത്യ ചെയ്തിരുന്നുവെന്നും ഇയാള്‍ക്കും മാനസികരോഗമുണ്ടായിരുന്നതായും പ്രതിഭാഗം വ്യക്തമാക്കി.
നീനുവിന്റെ രോഗനിര്‍ണയത്തിന് മെഡിക്കല്‍ ബോര്‍ഡ് രൂപീകരിക്കുന്നത് അടുത്ത 20 ന് കോടതി പരിഗണിക്കും. അതേസമയം കേസിലെ അഞ്ചാം പ്രതി ചാക്കോയുടെ ജാമ്യാപേക്ഷ ഹൈക്കോടതി ഇന്ന് പരിഗണിക്കും. കേസിലെ മറ്റ് 13 പ്രതികളുടെ ജാമ്യാപേക്ഷ പരിഗണിക്കുന്നത് ഏറ്റുമാനൂര്‍ കോടതി 20ലേക്കു മാറ്റി.