കരുവാരകുണ്ട്: പട്ടാപ്പകല്‍ കടകളിലെ മേശവലിപ്പ് കുത്തിത്തുറന്നു പണവും വിലപിടിപ്പുള്ള സാധനങ്ങളും മോഷ്ടിക്കുന്ന മോഷ്ടാവ് കരുവാരകുണ്ട് പൊലിസിന്റെ പിടിയിലായി. വീട്ടിക്കുന്ന് പുഴക്കല്‍ സന്തോഷ് ബാബു എന്ന രംഗന്‍ സന്തോഷ് എന്ന കുഞ്ഞുട്ടി (40) യാണ് പിടിയിലായത്.
തുറന്നുവച്ച കടകളും സ്ഥാപനങ്ങളും നിരീക്ഷിച്ച് ആളുകള്‍ പുറത്തേക്കു മാറുന്ന സമയം അകത്തുകയറി മോഷണം നടത്തുന്നതാണ് ഇയാളുടെ രീതി.
2017 നവംബറില്‍ വിയ്യൂര്‍ സെന്‍ട്രല്‍ ജയിലില്‍നിന്നു ശിക്ഷ കഴിഞ്ഞിറങ്ങിയതാണ്. ഇയാളെ പിടികൂടിയതോടെ കൊണ്ടോട്ടി, കിഴിശ്ശേരി, പാലക്കാട് ജില്ലയിലെ ആറ്റാശ്ശേരി, ശ്രീകൃഷ്ണപുരം, ആര്യമ്പാവ്, തൃശൂര്‍ ജില്ലയിലെ ഇത്തോണം, കറുകപുത്തൂര്‍ എന്നിവിടങ്ങളില്‍ നടത്തിയ മോഷണങ്ങള്‍ക്കു തുമ്പായി. 2016ല്‍ ഒരു കേസില്‍ പട്ടാമ്പി കോടതി ശിക്ഷ വിധിച്ചതോടെ കോടതിയില്‍ ഹാജരാകാതെ മുങ്ങിനടന്ന ഇയാളെ ഒന്നര വര്‍ഷം മുന്‍പു കരുവാരകുണ്ട് പൊലിസ് പിടിച്ചു കോടതിയില്‍ ഹാജരാക്കിയതായിരുന്നു.