കോഴിക്കോട്: നാട്ടുകാരുടെ തുല്യതയില്ലാത്ത സഹകരണത്തിനൊപ്പം സര്‍ക്കാര്‍ സംവിധാനങ്ങളുടെ ഏകോപനവും കരിപ്പൂര്‍ രക്ഷാദൗത്യത്തിന് സഹായകരമായി. റവന്യു, ആരോഗ്യം, പൊലിസ് വകുപ്പുകള്‍ നടത്തിയ യോജിച്ച ഇടപെടല്‍ ഫലപ്രദമായെന്നാണ് വിലയിരുത്തല്‍.കോഴിക്കോട് കലക്ടറേറ്റ് കേന്ദ്രീകരിച്ച് വെള്ളിയാഴ്ച രാത്രി മുഴുവന്‍ കലക്ടര്‍ സാംബശിവ റാവു രക്ഷാപ്രവര്‍ത്തനങ്ങള്‍ക്ക് നേതൃത്വം നല്‍കി. 

അപകട വിവരം അറിഞ്ഞയുടന്‍ തന്നെ കലക്ടറേറ്റില്‍ കണ്‍ട്രോള്‍ റൂം തുറന്നു. ജില്ലയിലെ നൂറോളം ആംബുലന്‍സുകള്‍ അപകടത്തില്‍പ്പെട്ടവരെ ആശുപത്രികളില്‍ എത്തിക്കാന്‍ എയര്‍പോര്‍ട്ടിലേക്ക് അയച്ചു. എയര്‍പോര്‍ട്ടില്‍നിന്ന് ആശുപത്രികളിലേക്കുള്ള ആംബുലന്‍സുകളുടെ യാത്ര സുഗമമാക്കാന്‍ പൊലിസ് രാത്രി മുഴുവന്‍ റോഡില്‍ കാവല്‍ നില്‍ക്കുകയായിരുന്നു.