ഇരിട്ടി: കുപ്രസിദ്ധ മോഷ്ടാവ് പനയ്ക്കല്‍ ചന്ദ്രന്‍ ഉള്‍പ്പെടെ നാലംഗ കവര്‍ച്ചാ സംഘത്തെ പൊലിസ് പിടികൂടി. കേരളത്തിലും കര്‍ണാടകയിലുമായി നിരവധി കവര്‍ച്ചാ ക്രിമിനല്‍ കേസുകളില്‍ പ്രതിയായ പെരുവണ്ണാമൂഴി പനയ്ക്കല്‍ വീട്ടില്‍ ചന്ദ്രന്‍ എന്ന പനയ്ക്കല്‍ ചന്ദ്രന്‍ (58), നിലമ്പൂര്‍ ഏലഞ്ചേരി ചെമ്പകശ്ശേരി ഹൗസില്‍ ജിമ്മി (42), മുഴക്കുന്ന് അയ്യപ്പന്‍കാവില്‍ അരയാക്കൂല്‍ ഹൗസില്‍ അബ്ദുല്‍ നിസാര്‍ എന്ന ഷെയ്ക്ക് നാസര്‍ (47), തൊട്ടില്‍പാലം സെയ്ദ് എന്ന അബ്ബാസ് (27) എന്നിവരെയാണ് ഉളിക്കല്‍ എസ്.ഐ ശിവന്‍ ചോടോത്തും സംഘവും അറസ്റ്റ് ചെയ്തത്. ഇവര്‍ സഞ്ചരിച്ച പിക്കപ്പ് വാഹനവും കസ്റ്റഡിയിലെടുത്തു.
വിരാജ്‌പേട്ടയിലെ മോഷണക്കേസില്‍ കര്‍ണാടക പൊലിസ് പിടികൂടി മൈസൂരു ജയിലില്‍ റിമാന്‍ഡിലായിരുന്ന ചന്ദ്രന്‍ ഒരാഴ്ച മുന്‍പാണ് പുറത്തിറങ്ങിയത്. ഇയാള്‍ നിരവധി കേസുകളില്‍ ശിക്ഷിക്കപ്പെട്ടിട്ടുണ്ടെന്നും വിവിധ കേസുകളില്‍ പല കോടതികളില്‍ ഇയാള്‍ക്ക് വാറന്‍ഡുണ്ടെന്നും പൊലിസ് പറഞ്ഞു.