ന്യൂഡല്‍ഹി: കഴിഞ്ഞ നിയമസഭാതിരഞ്ഞെടുപ്പില്‍ ഉത്തരാഖണ്ഡിലെ ആറ് നിയമസഭാ മണ്ഡലങ്ങളില്‍ ഉപയോഗിച്ച ഇലക്ട്രോണിക് വോട്ടിങ് യന്ത്രങ്ങള്‍ കൂടി പിടിച്ചെടുക്കാന്‍ ഉത്തരാഖണ്ഡ് ഹൈക്കോടതി ഉത്തരവ്. നേരത്തെ, വികാസ് നഗര്‍ മണ്ഡലത്തില്‍ ഉപയോഗിച്ച വോട്ടിങ് യന്ത്രങ്ങളില്‍ ക്രമക്കേട് നടന്നെന്ന് ആരോപിച്ച് പരാജയപ്പെട്ട സ്ഥാനാര്‍ഥി നല്‍കിയ ഹരജിയില്‍ ഈ മണ്ഡലത്തിലെ വോട്ടിങ് യന്ത്രങ്ങള്‍ ജുഡീഷ്യല്‍ കസ്റ്റഡിയില്‍ എടുക്കാന്‍ കോടതി ഉത്തരവിട്ടിരുന്നു. ഇതിനു പിന്നാലെയാണ് രണ്ടു ജില്ലകളിലെ ആറു മണ്ഡലങ്ങളിലെ കൂടി വോട്ടിങ് യന്ത്രങ്ങള്‍ കണ്ടുക്കെട്ടാന്‍ കോടതി ഉത്തരവിട്ടിരിക്കുന്നത്.
വോട്ടിങ് യന്ത്രത്തില്‍ കൃത്രിമം കാട്ടിയെന്നാരോപിച്ച് ഇവിടെ പരാജയപ്പെട്ട മുന്‍ മുഖ്യമന്ത്രി ഹരീഷ് റാവത്ത് ഉള്‍പ്പെടെയുള്ള കോണ്‍ഗ്രസ് സ്ഥാനാര്‍ഥികള്‍ നല്‍കിയ ഹരജിയിലാണ് ജസ്റ്റിസ് സാര്‍വേഷ് കുമാര്‍ ഗുപ്തയുടെ ഉത്തരവ്.48 മണിക്കൂറിനുള്ളില്‍ വോട്ടിങ് യന്ത്രങ്ങള്‍ സീല്‍ ചെയ്ത് കണ്ടുകെട്ടാനാണ് ഹൈക്കോടതി ഉത്തരവിട്ടിരിക്കുന്നത്.