കോഴിക്കോട്: മോദിയെ മാത്രം ആശ്രയിച്ച് രാജ്യം വളരില്ലെന്നും പ്രസംഗത്തിലെ ഊക്ക് കൊണ്ട് ഇന്ത്യ പുരോഗമിക്കുകയില്ലെന്നും മുസ്‌ലിം ലീഗ് ദേശീയ ജന. സെക്രട്ടറി പി.കെ കുഞ്ഞാലിക്കുട്ടി. മുസ്‌ലിം യൂത്ത് ലീഗ് ജില്ലാ കമ്മിറ്റി കോഴിക്കോട്ട് സംഘടിപ്പിച്ച 'യൂത്ത് മീറ്റ് ' ഉദ്ഘാടനം ചെയ്യുകയായിരുന്നു അദ്ദേഹം. മോദിദിയെ അവിടെ ആണിയടിച്ച് നിര്‍ത്തിയതല്ല, ഭരണം മോശമായാല്‍ അധികാരത്തിലേറ്റിയവര്‍ തന്നെ ഇറക്കിവിടുമെന്നും അദ്ദേഹം പറഞ്ഞു.
പത്തു വര്‍ഷം ഭരിച്ച പഞ്ചാബില്‍ ബി.ജെ.പി മൂന്നാം സ്ഥാനത്തായി. ഗോവയിലും വലിയ തിരിച്ചടിയാണുണ്ടയത്. രാഷ്ട്രീയ കാലാവസ്ഥ മാറിവരികയാണ്. എന്നാല്‍ ഇതൊന്നും മനസിലാക്കാതെ എങ്ങോട്ട് ചാടണമെന്ന് അറിയാതെ വേലിപ്പുറത്താണ് സി.പി.എം. കോണ്‍ഗ്രസിന്റെ നേതൃത്വത്തിലുള്ള വിശാല മുന്നണിയുടെ ഭാഗമാകാതെ അവര്‍ക്ക് ഒന്നും ചെയ്യാനാവില്ല. സി.പി.എമ്മിന്റെ ശക്തി എവിടെയൊക്കെയുണ്ടെന്ന് എല്ലാവര്‍ക്കും അറിയാം. ഒറ്റക്ക് ഒന്നും ചെയ്യാന്‍ ആര്‍ക്കും കഴിയില്ല. ബംഗാളില്‍ ഉപ്പുവച്ച കലം പോലെയായി അവര്‍. രാജ്യസഭയിലെത്താന്‍ സീതാറാം യെച്ചൂരിയെ പിന്തുണക്കാമെന്ന കോണ്‍ഗ്രസ് വാഗ്ദാനം സ്വീകരിക്കാത്ത സി.പി.എമ്മിന്റേത് ചരിത്രപരമായ വിഡ്ഢിത്തമാണെന്നും കുഞ്ഞാലിക്കുട്ടി കൂട്ടിച്ചേര്‍ത്തു.