റോം: സ്ലാറ്റന്‍ ഇബ്രാഹീമോവിച്ച് എ.സി മിലാനില്‍ തുടരും. കഴിഞ്ഞ ദിവസമാണ് താരം ഒരു വര്‍ഷത്തെ കരാര്‍ കൂടി ഒപ്പുവച്ചത്. അവസാന സീസണിന്റെ പകുതിയോടെയായിരുന്നു ഇബ്രാഹീമോവിച്ച് മിലാനിലെത്തിയത്. അന്ന് ആറുമാസമായിരുന്നു കരാര്‍ ഉണ്ടായിരുന്നത്. പ്രകടനം മെച്ചപ്പെടുകയാണെങ്കില്‍ കരാര്‍ ആറു മാസം കൂടി ഒരു വര്‍ഷത്തേക്ക് നീട്ടി നല്‍കാമെന്നായിരുന്നു കരാറിലുണ്ടായിരുന്നത്. എന്നാല്‍ ഇബ്രാഹീമോവിച്ചിന്റെ മികച്ച പ്രകടനം കാരണം കരാര്‍ ആറു മാസത്തേക്ക് കൂടി നീട്ടി നല്‍കി സീസണ്‍ പൂര്‍ത്തിയാക്കുകയായിരുന്നു. ജനുവരിയില്‍ മാത്രം മിലാനിലെത്തിയ ഇബ്ര 10 ഗോളുകള്‍ ക്ലബിനായി നേടി. ഇതാണ് താരത്തിന് ഒരു വര്‍ഷത്തേക്ക് കൂടി കരാര്‍ നീട്ടി നല്‍കാന്‍ കാരണമായത്. 38 കാരനായ ഇബ്രാഹീമോവിച്ച് എം.എല്‍.എസ് ക്ലബായ ലാ ഗാലക്‌സിയില്‍ നിന്നായിരുന്നു മിലാനിലെത്തിയത്.