ലക്‌നൗ: കോണ്‍ഗ്രസില്‍ സ്ഥിരനേതൃത്വം വേണമെന്ന ആവശ്യമുന്നയിച്ച് താനടക്കമുള്ള 23 പേര്‍ ഒപ്പിട്ട കത്ത് നല്ല ഉദ്ദേശ്യത്തോടെയായിരുന്നെന്നും എന്നാല്‍ തങ്ങളുടെ കത്ത് തെറ്റിദ്ധരിക്കപ്പെട്ടെന്നും കോണ്‍ഗ്രസ് നേതാവ് ജിതിന്‍ പ്രസാദ. ജിതിന്‍ പ്രസാദയ്‌ക്കെതിരേ നടപടിയാവശ്യപ്പെട്ട് കോണ്‍ഗ്രസിന്റെ യു.പി ഘടകം രംഗത്തെത്തുകയും കപില്‍ സിബലടക്കമുള്ളവര്‍ അദ്ദേഹത്തെ പിന്തുണച്ച് രംഗത്തെത്തുകയും ചെയ്തതിനു പിന്നാലെയാണ് ജിതിന്‍ പ്രസാദയുടെ വിശദീകരണം.
തനിക്കു സോണിയാഗാന്ധിയുടെയും രാഹുലിന്റെയും നേതൃത്വത്തില്‍ വിശ്വാസമുണ്ടെന്നും അവര്‍ തന്നെയും വിശ്വസിക്കുന്നുണ്ടെന്നും അദ്ദേഹം വ്യക്തമാക്കി. കോണ്‍ഗ്രസ് നേതൃത്വത്തെ ഉന്നംവച്ചാണ് കത്തെഴുതിയതെന്ന ആരോപണം അദ്ദേഹം തള്ളി. എന്നാല്‍, ജിതിന്‍ പ്രസാദയുടെ കുടുംബപശ്ചാത്തലം ഗാന്ധി കുടുംബത്തിന് എതിരാണെന്നും അദ്ദേഹത്തിനെതിരേ നടപടി വേണമെന്നും യു.പിയിലെ കോണ്‍ഗ്രസ് ഘടകം ആവശ്യപ്പെട്ടിരുന്നു. ഈ ആവശ്യത്തിനെതിരേ കപില്‍ സിബല്‍ പരസ്യമായി രംഗത്തെത്തുകയും ചെയ്തിരുന്നു.