ന്യൂഡല്‍ഹി: കോടതിയുടെ പരിഗണനയിലിരിക്കുന്ന വിഷയങ്ങള്‍ പാര്‍ലമെന്ററി സമിതികള്‍ ചര്‍ച്ച ചെയ്യരുതെന്ന് നിര്‍ദേശിച്ച് പാര്‍ലമെന്ററി സമിതി ചെയര്‍മാന്‍മാര്‍ക്ക് ലോക്‌സഭാ സ്പീക്കര്‍ ഓംബിര്‍ലയുടെ കത്ത്.
ലോക്‌സഭയുടെ മഴക്കാല സമ്മേളനം തുടങ്ങാന്‍ ദിവസങ്ങള്‍ മാത്രം ബാക്കിയിരിക്കെയാണ് ഈ മാസം 25ന് സ്പീക്കര്‍ കത്തയച്ചത്. എന്നാല്‍ പാര്‍ലമെന്ററി സമിതികള്‍ക്ക് മേല്‍ കൂടുതല്‍ നിയന്ത്രണം കൊണ്ടുവരാനുള്ള നീക്കമാണ് സ്പീക്കര്‍ നടത്തുന്നതെന്നും കോടതിയുടെ പരിഗണനയിലിരിക്കുന്ന നിരവധി വിഷയങ്ങള്‍ നേരത്തെ സമിതികള്‍ ചര്‍ച്ച ചെയ്തിട്ടുണ്ടെന്നും ചൂണ്ടിക്കാട്ടി മുതിര്‍ന്ന അംഗങ്ങളും മുന്‍ സമിതി ചെയര്‍മാന്‍മാരില്‍ ചിലരും രംഗത്തുവന്നു.
പാര്‍ലമെന്ററി സമിതിയെന്നാല്‍ പാര്‍ലമെന്റിന്റെ തന്നെ ഭാഗമാണെന്നും പാര്‍ലമെന്റിനുള്ള അധികാരങ്ങള്‍ സമിതിക്കുമുണ്ടെന്നും നിരവധി ചുമതലകള്‍ വഹിച്ചിട്ടുള്ള കോണ്‍ഗ്രസ് നേതാവ് വീരപ്പ മൊയ്‌ലി ചൂണ്ടിക്കാട്ടി.
നിരവധി വിഷയങ്ങള്‍ കോടതിക്ക് മുന്നിലുണ്ട്. ഇതൊന്നും ചര്‍ച്ച ചെയ്യാന്‍ പാടില്ലെന്ന് വന്നാല്‍ പിന്നെന്ത് ചര്‍ച്ച ചെയ്യും. രാഷ്ട്രീയ വ്യത്യാസമില്ലാതെ വിഷയങ്ങള്‍ ചര്‍ച്ച ചെയ്യുന്ന ഫോറമാണ് പാര്‍ലമെന്ററി സമിതി.
പാര്‍ലമെന്റിനെക്കാള്‍ തുറന്ന സംവിധാനമാണ് അതെന്നും മൊയ്‌ലി ചൂണ്ടിക്കാട്ടി. മുന്‍ സ്പീക്കര്‍മാരാരും സമിതിയുടെ പ്രവര്‍ത്തനങ്ങളില്‍ ഇടപെടാറില്ലായിരുന്നുവെന്ന് പാര്‍ലമെന്റ് പബ്ലിക് അക്കൗണ്ട്‌സ് കമ്മറ്റി മുന്‍ ചെയര്‍മാന്‍ കെ.വി തോമസ് പ്രതികരിച്ചു. സ്പീക്കര്‍ കമ്മറ്റിയുടെ പ്രവര്‍ത്തനത്തില്‍ ഇടപെടുന്നത് ആദ്യമായാണെന്ന് ലോക്‌സഭ മുന്‍ ജനറല്‍ സെക്രട്ടറി സുഭാഷ് കാശ്യപ് പറഞ്ഞു.
സമിതികള്‍ നേരത്തെ തന്നെ കോടതിയിലുള്ള സി.എ.ജി റിപോര്‍ട്ട് ഉള്‍പ്പെടെയുള്ള നിരവധി വിഷയങ്ങള്‍ ചര്‍ച്ച ചെയ്തതായി പബ്ലിക് അക്കൗണ്ട്‌സ് കമ്മറ്റി ചെയര്‍മാന്‍ ആദിര്‍ രഞ്ജന്‍ ചൗധരി പറഞ്ഞു.
ടു.ജി, അഗസ്ത വെസ്റ്റ്‌ലാന്‍ഡ് കേസ്, പഞ്ചാബ് നാഷണല്‍ ബാങ്ക് കുംഭകോണം തുടങ്ങി നിരവധി കേസുകള്‍ നേരത്തെ തന്നെ ചര്‍ച്ച ചെയ്തിട്ടുണ്ടെന്നും ചൗധരി പറഞ്ഞു.