പെര്‍ള: പ്രളയബാധിതര്‍ക്ക് കൈത്താങ്ങായി എന്‍.എസ്.എസ് വിദ്യാര്‍ഥികള്‍. കാട്ടുകുക്കെ ഹയര്‍ സെക്കന്‍ഡറി സ്‌കൂളിലെ എന്‍.എസ്.എസ് യൂനിറ്റിന്റെ നേതൃത്വത്തിലാണ് ദുരിതാശ്വാസ ക്യാംപില്‍ കഴിയുന്നവര്‍ക്ക് സാധന സാമഗ്രികള്‍ നല്‍കിയത്. എന്‍.എസ്.എസ് വളണ്ടിയര്‍മാരും അധ്യാപകരും കാസര്‍കോട് ഗവ. കോളജിലെ ദുരിതാശ്വാസ വിഭവ സമാഹാരണ കേന്ദ്രത്തിലെത്തി എം.എല്‍.എ എന്‍.എ നെല്ലിക്കുന്നിന്റെ സാന്നിധ്യത്തില്‍ ജില്ലാ കലക്ടര്‍ ഡോ. സജിത് ബാബുവിന് സാധനങ്ങള്‍ കൈമാറി.
മുപ്പതിനായിരത്തോളം രൂപ വിലമതിക്കുന്ന വസ്ത്രങ്ങള്‍, സോപ്പ്, ഭക്ഷണ സാധനങ്ങള്‍, ഡിറ്റര്‍ജന്റ്, ബ്ലീച്ചിങ് പൗഡര്‍, മിനറല്‍ വാട്ടര്‍, നോട്ട് പുസ്തകങ്ങള്‍ തുടങ്ങിയവയാണ് കൈമാറിയത്. എന്‍.എസ്.എസ് പ്രോഗ്രാം ഓഫിസര്‍ വൈ. മഹേഷ്, സീനിയര്‍ അധ്യാപകന്‍ രാജേഷ് , സുപ്രീത് എന്നിവര്‍ നേതൃത്വം നല്‍കി.