കൊടുങ്ങല്ലൂര്‍: പ്രളയത്തില്‍ കൊടുങ്ങല്ലൂരിന് നഷ്ടമായത് 700 ക്വിന്റല്‍ ഭക്ഷ്യധാന്യം. കൊടുങ്ങല്ലൂരില്‍ സിവില്‍ സപ്ലൈസ് കോര്‍പ്പറേഷന്റെ ഗോഡൗണില്‍ സൂക്ഷിച്ചിരുന്ന 1400 ചാക്ക് ധാന്യമാണ് പ്രളയത്തില്‍ മുങ്ങി നശിച്ചത്.
മട്ട, പുഴുക്കല്‍, പച്ച എന്നീ തരം അരി, ഗോതമ്പ്, ആട്ട എന്നീ ധാന്യങ്ങളാണ് ഉള്‍പ്പെട്ടിരുന്നത്. സര്‍ക്കാര്‍ നിരക്കില്‍ ഏകദേശം ആറ് ലക്ഷത്തോളം രൂപ വിലവരുന്ന ധാന്യങ്ങളാണ് വെള്ളത്തിലായത്. വിപണി വില കണക്കാക്കിയാല്‍ നഷ്ടം പല മടങ്ങാകും.
വയലാര്‍ റോഡിലുള്ള ഗോഡൗണില്‍ സൂക്ഷിച്ചിരുന്ന ധാന്യ ചാക്കുകള്‍ മുഴുവനും നഞ്ഞ് ഉപയോഗശൂന്യമായി. ഗോഡൗണ്‍ അപ്പാടെ ദിവസങ്ങളോളം വെള്ളത്തിലായിരുന്നു. ഗോഡൗണിനോട് ചേര്‍ന്നുള്ള ഓഫീസിലെ കപ്യൂട്ടറും അനുബന്ധ സാമഗ്രികളും കേടായി. താലൂക്ക് സപ്ലൈ ഓഫിസര്‍, സപ്ലൈകോ ജില്ലാ അസി.മാനേജര്‍ എന്നിവരുടെ നേതൃത്വത്തിലുള്ള സംഘം ഗോഡൗണ്‍ സന്ദര്‍ശിച്ച് നഷ്ടത്തിന്റെ കണക്കെടുത്തു. അന്വേഷണ റിപ്പോര്‍ട്ട് വൈകാതെ ജില്ലാ സപ്ലൈ ഓഫിസര്‍ക്ക് കൈമാറും.