ഗൂഡല്ലൂര്‍: സ്‌കൂള്‍ കുട്ടികള്‍ കടുവയെ കണ്ട് ഭയന്നോടി. നെല്ലാക്കോട്ട പഞ്ചായത്തിലെ അമ്പലമൂല വട്ടക്കൊല്ലിയിലാണ് സംഭവം. കടുവയും രണ്ട് കുട്ടികളും കടമാനിനെ ഓടിക്കുന്നതാണ് വിദ്യാര്‍ഥികള്‍ കണ്ടത്. ഇന്നലെ രാവിലെ അമ്പലമൂല ഗവ. സ്‌കൂളിലേക്കുള്ള വഴിമധ്യേയാണ് വിദ്യാര്‍ഥികള്‍ കടുവകളെ കണ്ടത്. കടുവയെ കണ്ടതോടെ ഭയന്ന് വിറച്ച് കുട്ടികള്‍ ഓടി രക്ഷപ്പെടുകയായിരുന്നു. നാട്ടുകാരുടെ പരാതിയുടെ അടിസ്ഥാനത്തില്‍ ബിദര്‍ക്കാട് റെയ്ഞ്ചര്‍ ഗണേഷന്റെ നേതൃത്വത്തിലുള്ള വനപാലക സംഘം സംഭവസ്ഥലത്തെത്തി പരിശോധന നടത്തി. വനം വകുപ്പ് ഉദ്യോഗസ്ഥരായ പത്മനാഥന്‍, രാമചന്ദ്രന്‍, ഹേമചന്ദ്രന്‍ എന്നിവര്‍ ഈ മേഖലയില്‍ നിരീക്ഷണം നടത്തി കടുവയുടെ സാന്നിധ്യം സ്ഥിരീകരിച്ചു. പരിശോധനയില്‍ കടുവയുടെ കാല്‍പദം പതിഞ്ഞത് കണ്ടെത്തിയിട്ടുണ്ട്. ഇതോടെ ഈ മേഖലയില്‍ വനം വകുപ്പ് നിരീക്ഷണത്തിനായി മൂന്ന് കാമറകള്‍ സ്ഥാപിച്ചു. കടുവയുടെ സാന്നിധ്യം സ്ഥിരീകരിച്ചതോടെ പ്രദേശവാസികള്‍ ഭീതിയിലാണ് കഴിയുന്നത്.