പാലക്കാട് : ജലാശയങ്ങളിലുള്ള മുങ്ങി മരണങ്ങള്‍ വര്‍ധിക്കുമ്പോഴും സൂചനാ ബോര്‍ഡുകളുള്‍പ്പടെയുള്ളു സുരക്ഷാ സംവിധാനങ്ങള്‍ മിക്കയിടത്തും കടലാസിലൊതുങ്ങുന്നു ജില്ലയിലെ വിനോദ സഞ്ചാര കേന്ദ്രങ്ങളിലും അല്ലാത്തതുമായ ചെറുതും വലുതമായ ജലാശയങ്ങള്‍ക്കു മുമ്പില്‍ സൂചനാ ബോര്‍ഡുകള്‍ ഇല്ലാത്തതും മാഞ്ഞുപോയ സ്ഥിതിയിലുമാണ്.
ചിലയിടങ്ങളില്‍ സൂചനാ ബോര്‍ഡുകള്‍ സ്ഥാപിക്കുന്നുണ്ടെങ്കിലും ഇവ മലയാലത്തിനു പുറമെ ഇതര ഭാഷകളില്ലാത്തത് പലപ്പോഴും അപകടത്തിന് കാരണമാവുന്നു. ജലാശയങ്ങളിലെത്തുന്നവര്‍ കൂടുതലും ഇതര സംസ്ഥാനക്കാരായതിനാല്‍ മലയാളത്തിനു പുറമെ ഇംഗ്ലീഷ്, ഹിന്ദി ഭാഷകളില്‍ കൂടി നിയമാവലികള്‍ എഴുതണമെന്നത് മിക്കയിടത്തും പാലിക്കപ്പെടുന്നില്ല.
മുങ്ങി മരണങ്ങള്‍ സംഭവിക്കുന്നത്. മലമ്പുഴ, വാളയാര്‍, പോത്തുണ്ടി, മീങ്കര അണക്കെട്ടുകളില്‍ മുന്‍ വര്‍ഷങ്ങളില്‍ നിരവധി ജീവനുകളാണ് പൊലിഞ്ഞിട്ടുള്ളത്. അയല്‍ ജില്ലകളില്‍ നിന്നും അയല്‍ സംസ്ഥാനങ്ങളില്‍ നിന്നും അവധിക്കാലമാഘോഷിക്കാനെത്തുന്നവരാണ് കൂടുതലും ജലാശയങ്ങളില്‍പ്പെടുന്നത്. കൂടുതലും 18 നും 25 നും ഇടക്ക് പ്രായമുള്ളവരാണ് ജലാശയങ്ങളിലെ മുങ്ങി മരണങ്ങളിലെ ഇരകളാവുന്നവര്‍. മുന്നറിയിപ്പു ബോര്‍ഡുകളുണ്ടെങ്കിലും ഇവ വകവെക്കാതെ ജലാശയങ്ങളിലിറങ്ങുന്നവരാണ് മരണച്ചുഴികളില്‍ മുങ്ങിത്താഴുന്നത്.
മിക്ക ജലാശയങ്ങളിലെയും മരണച്ചുഴികള്‍ എവിടെയെന്നത് പ്രദേശവാസികള്‍ക്കുമാത്രമുള്ള അറിവാണെന്നിരിക്കെ ഇതറിയാതെ ഇറങ്ങുന്നവരാണ് അപകടത്തിലപ്പെടുന്നത്. ജില്ലയില്‍ ഏറ്റവും കൂടുതല്‍ മുങ്ങി മരണം സംഭിവിക്കുന്നതും അതിര്‍ത്തി പങ്കിടുന്ന പ്രദേശമായ വാളയാര്‍ ഡാമിലാണ് കഴിഞ്ഞ 3 മാസത്തിനിടെ മാത്രം പതിനെട്ടോളം പേരാണ് വിവിധ ജലാശയങ്ങളില്‍ മരണത്തിനു കീഴടങ്ങിയത്. ഇതില്‍ പോളിടെക്‌നിക്കിനു സമീപത്തെ കുളത്തില്‍ മാത്രം 2 ജീവനുകള്‍ പൊലിഞ്ഞിരുന്നു. ജില്ലയില്‍ അപകട സാധ്യതയുള്ള 63 ജലാശയങ്ങളുണ്ടെന്ന് അധികൃതര്‍ തന്നെ പറയുമ്പോഴും പലര്‍ക്കും ഇത് അജ്ഞാതമാണ്.
ജില്ലയിലെ ഏഴു അഗ്നി രക്ഷാ കാര്യാലയങ്ങള്‍ക്കു കീഴിലുള്ളതാണ് അപകട സാധ്യതയുള്ള 63 ജലാശയങ്ങളുമെന്നിരിക്കെ ഇവയ്ക്കുമുന്നിലൊക്കെ ഫോണ്‍ നമ്പറുകളടങ്ങിയ മുന്നറിയിപ്പു ബോര്‍ഡുകളും സ്ഥാപിച്ചുവരികയാണ്. ജില്ലയിലെ അപകടസാധ്യതയുള്ള 63 ജലാശയങ്ങളില്‍ 30 എണ്ണം കൂടുതല്‍ അപകട സാധ്യതയുള്ളവയാണ്. രാജ്യത്ത് നടക്കുന്ന മുങ്ങി മരണങ്ങളില്‍ 8 ശതമാനവും സംസ്ഥാനത്താണെന്നത് പരിതാപകരമാണ്.
രാജ്യത്ത് പ്രതിവര്‍ഷം 3000 പേരും പ്രതിദിനം 80 പേരും മുങ്ങി മരിക്കുമ്പോള്‍ സംസ്ഥാനത്ത് 1500 ഓളം പേരും പ്രതിദിനം 2 പേരും മുങ്ങിമരിക്കുന്നുണ്ടെന്നാണ് ക്രൈം റിക്കാര്‍ഡ് ബ്യൂറോയുടെ കണക്കുകള്‍ പറയുന്നത്. കഴിഞ്ഞ 10 വര്‍ഷത്തിനിടെ സംസ്ഥാനത്തെ പാറമടകളില്‍ മാത്രം 800 ഓളം പേര്‍ മരിച്ചപ്പോള്‍ 2002-07 വരെയുള്ള കാലഘട്ടത്തില്‍ 260 പേര്‍ മുങ്ങി മരണത്തിനു കീഴടങ്ങിയിട്ടുണ്ട്. സംസ്ഥാനത്തെ ജലാശയങ്ങളില്‍ 2010 ല്‍ 137 ഉം 2015 ല്‍ 138 ഉം 2016 ല്‍ 139 പേരും മരിച്ചതായി കണക്കുകള്‍ പറയുന്നു. വിനോദ സഞ്ചാര കേന്ദ്രങ്ങളിലുള്ള ജലാശയങ്ങള്‍, അമ്പലക്കുളങ്ങള്‍, പൊതുകുളങ്ങള്‍, പുഴകള്‍ എന്നിവയിലൊക്കെയാണ് മുങ്ങിമരണ സാധ്യതകളേറെയുള്ളത്.
മിക്കയിടത്തും സൂചന ബോര്‍ഡുകള്‍ മാഞ്ഞുപോയതും പുതിയവ സ്ഥാപിച്ചതില്‍ മലയാളമല്ലാതെ ഇതര ഭാഷകളുടെ സാന്നിദ്ധ്യമില്ലായ്മയുമാണ് മരണസാധ്യതക്ക് കാരണമാവുന്നുണ്ട്. ഇതിനു പുറമെ പാറമടകളിലും അനധികൃത ക്വാറികളിലുമുള്ള ജലാശയങ്ങളിലും മരണത്തിന്റെ സാധ്യത തള്ളിക്കളയാനാവില്ല.
ജലാശയങ്ങളെപ്പറ്റി സമഗ്രമായ അറിവില്ലാത്തതും ഇവയിലറങ്ങുന്നവര്‍ക്ക് നീന്തല്‍ അറിയാത്തതുമാണ് പലപ്പോഴും യുവാക്കളെ മരണത്തിലേക്കു തള്ളിയിടുന്നത്. മിക്കയിടത്തും രക്ഷകരായി സമീപവാസികള്‍ ഓടിയെത്തുമെങ്കിലും മുങ്ങിത്താഴ്ന്നവരെ കരക്കടുപ്പിക്കാന്‍ അഗ്നി രക്ഷാ സേനകളെത്തെണം അനധിതമായ മണലൂറ്റലുമൂലം മിക്ക ജലാശയങ്ങളിലും മരണക്കുഴികളുടെ എണ്ണം കൂടിവരികയാണ്. ജലാശയങ്ങളിലെ മരണക്കുഴികളെപ്പറ്റി ഇവിടെയെത്തുന്നവര്‍ ബോധവാന്‍മാരാകുകയും നീന്തലറിയാത്തവര്‍ ജലാശയങ്ങളിലിറങ്ങാതിരിക്കുകയും പോലുള്ള കാര്യങ്ങള്‍ പാലിക്കാത്തിടത്തോളം ജലാശയങ്ങളിലെ മുങ്ങി മരണത്തോത് വര്‍ധിക്കുമെന്നതില്‍ സംശയമില്ല.