ന്യൂയോര്‍ക്ക്: കറുത്തവര്‍ഗക്കാര്‍ക്കു നേരെ വംശീയാതിക്രമം തുടരുന്ന യു.എസില്‍ മറ്റൊരു യുവാവിനെ കൂടി ശ്വാസംമുട്ടിച്ച് കൊലപ്പെടുത്തിയ സംഭവത്തില്‍ ഏഴു പൊലിസുകാരെ സസ്‌പെന്‍ഡ് ചെയ്തു. 

ഡാനിയല്‍ പ്രൂഡ് എന്ന യുവാവിന്റെ മുഖം മൂടിയശേഷം കൊലപ്പെടുത്തിയ സംഭവം മാര്‍ച്ചിലായിരുന്നു നടന്നത്. എന്നാല്‍ കഴിഞ്ഞ ദിവസം ഇതിന്റെ വിഡിയോ പുറത്തുവന്നതോടെയാണ് റോചസ്റ്റര്‍ മേയര്‍ ലവ്‌ലി വാറന്‍ കുറ്റക്കാര്‍ക്കെതിരേ നടപടിയെടുത്തത്. 

നഗ്നനായി കൈവിലങ്ങണിയിക്കപ്പെട്ട പ്രൂഡിനെ മുഖം കവര്‍കൊണ്ട് മൂടി ഒരു പൊലിസുകാരന്‍ അമര്‍ത്തിപ്പിടിക്കുകയും മറ്റൊരാള്‍ പുറത്ത് കാല്‍മുട്ട് വച്ച് അമര്‍ത്തുകയും ചെയ്യുന്നതാണ് വിഡിയോയിലുള്ളത്. 

41കാരനായ യുവാവ് നിങ്ങളെന്നെ കൊല്ലാന്‍ നോക്കുകയാണോ എന്ന് പറയുന്നതും ദൃശ്യത്തിലുണ്ട്. പിന്നീട് ആശുപത്രിയില്‍ വച്ചാണ് യുവാവ് മരിച്ചത്. നേരത്തെ ജോര്‍ജ് ഫ്‌ളോയിഡ് എന്ന കറുത്തവര്‍ഗക്കാരനെ കൊന്നതും ശ്വാസംമുട്ടിച്ചായിരുന്നു.