മുംബൈ: ബോളിവുഡ് താരം സുശാന്ത് സിങ് രജ്പുത്തിന്റെ മരണവുമായി ബന്ധപ്പെട്ട് നടിയും കാമുകിയുമായ റിയ ചക്രബര്‍ത്തി അറസ്റ്റിന് തയാറാണെന്ന് അഭിഭാഷകന്‍. നടിക്കെതിരേ മാധ്യമങ്ങളും ഒരുസംഘവും പ്രവര്‍ത്തിക്കുകയാണ്.
ഇരുവരും തമ്മില്‍ ഇഷ്ടത്തിലായിരുന്നുവെന്നും അതൊരു കുറ്റമാണങ്കില്‍ ആ കുറ്റത്തിന്റെ ഫലം ഏറ്റുവാങ്ങാന്‍ റിയ തയാറാണെന്നും റിയ ചക്രബര്‍ത്തിയുടെ അഭിഭാഷകന്‍ മാധ്യമങ്ങളോട് പറഞ്ഞു.
ഇതിനിടെ മാധ്യമങ്ങള്‍ നടിയെ അനാവശ്യമായി വേട്ടയാടുന്നതായി വിവിധ കോണുകളില്‍ നിന്ന് വിമര്‍ശനം ഉയര്‍ന്നു. സുശാന്തിന്റെ മരണവുമായി ബന്ധപ്പെട്ട് റിയ ചക്രബര്‍ത്തിയെ നാര്‍കോട്ടിക് കണ്ട്രോള്‍ ബ്യൂറോ ചോദ്യം ചെയ്തു. മയക്കുമരുന്ന് ഇടപാടില്‍ റിയയുടെ സഹോദരന്‍ ഷോവിക് ചക്രബര്‍ത്തിയെയും സുശാന്തിന്റെ മാനേജര്‍ സാമുവേല്‍ മിറാന്‍ഡയേയും കഴിഞ്ഞ ദിവസം നാര്‍കോട്ടിക്‌സ് വിഭാഗം അറസ്റ്റ് ചെയ്തിരുന്നു.
എന്നാല്‍ തന്റെ മധ്യവര്‍ഗ കുടുംബത്തെ തകര്‍ക്കാനുള്ള ശ്രമമാണ് അധികൃതര്‍ നടത്തുന്നതെന്ന് റിയ ചക്രബര്‍ത്തിയുടെ പിതാവ് ഇന്ദ്രജിത് ചക്രബര്‍ത്തി പറഞ്ഞു.