പാലക്കാട്: ബൈക്കിന്റെ അടവു തെറ്റിയതിന് വീട്ടില്‍ക്കയറി ദമ്പതികളെ മര്‍ദിച്ച് കവര്‍ച്ച നടത്തിയ സംഭവത്തില്‍ ഒളിവിലായിരുന്ന ക്വട്ടേഷന്‍ സംഘാംഗം അറസ്റ്റില്‍. പാലക്കാട്, കൊടുന്തിരപ്പുള്ളി, നെടുമ്പറമ്പ് വീട്ടില്‍ സിജില്‍( 28) നെയാണ് കൊടുന്തിരപ്പുള്ളിയില്‍ വെച്ച് നോര്‍ത് പൊലീസ് കസ്റ്റഡിയിലെടുത്തത്.
കഴിഞ്ഞ മെയ് മാസത്തിലാണ് കേസ്സിന് ആസ്പദമായ സംഭവം നടന്നത്. സ്വകാര്യ ഫിനാന്‍സ് സ്ഥാപനത്തില്‍ നിന്നും അടവിന് ബൈക്ക് വാങ്ങിയ കൊടുന്തിരപ്പുള്ളി, അമ്പലപ്പറമ്പ് സ്വദേശിയായ പരാതിക്കാരന്‍ തിരിച്ചടവ് തെറ്റിച്ചതിലാണ് സ്ഥാപനത്തിലെ ജീവനക്കാര്‍ ഉള്‍പ്പെടെ മൂവര്‍ സംഘം വീട്ടിലെത്തി പരാതിക്കാരനെ മര്‍ദ്ദിക്കുന്നതു കണ്ട് തടയാനെത്തിയ ഭാര്യയെയും മര്‍ദിക്കുകയും , വീട്ടില്‍ നിര്‍ത്തിയിട്ടിരുന്ന ബൈക്ക് കവര്‍ച്ച ചെയ്ത് കൊണ്ടു പോവുകയും ചെയ്യുകയായിരുന്നു.
ശേഷം പൊലീസില്‍ പരാതി നല്‍കിയതറിഞ്ഞ് പ്രതികള്‍ ഒളില്‍ പോവുകയായിരുന്നു. ഇന്നലെ സിജില്‍ വീട്ടിലേക്ക് വരുന്നുണ്ടെന്നുള്ള രഹസ്യ വിവരം കിട്ടിയതിന്റെ അടിസ്ഥാനത്തില്‍ നടത്തിയ അന്വേഷണത്തിലാണ് വലയിലായത്. സിജിലിന് നേരത്തെ പാലക്കാട് ടൗണ്‍ നോര്‍ത്, സൗത് പൊലീസ് സ്റ്റേഷനുകളിലായി കൊലപാതകശ്രമം ഉള്‍പ്പെടെ അഞ്ചോളം ക്രിമിനല്‍ കേസ്സുകള്‍ നിലവിലുണ്ട്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
പാലക്കാട് ടൗണ്‍ നോര്‍ത് ഇന്‍സ്‌പെക്ടര്‍ ഇ. അലവി, എസ്.ഐ.രഞ്ജിത്ത്, രാജേഷ്,കിഷോര്‍, സുനില്‍ , അഹമ്മദ് കബീര്‍,വിനീഷ്, രാജീദ് എന്നിവരടങ്ങിയ സംഘമാണ് കേസന്വേഷണം നടത്തുന്നത്.