കൊച്ചി: ഹൃദയസംബന്ധമായ അസുഖത്തെത്തുടര്‍ന്ന് മംഗലാപുരത്തുനിന്നും എറണാകുളം അമൃതാ ആശുപത്രിയില്‍ എത്തിച്ച പിഞ്ചുകുഞ്ഞ് സുഖം പ്രാപിക്കുന്നു.
ഇപ്പോള്‍ ഒരുമാസം പ്രായമായ കുഞ്ഞിന്റെ ആരോഗ്യനില തൃപ്തികരമാണെന്ന് ആശുപത്രി വൃത്തങ്ങള്‍ അറിയിച്ചു. കഴിഞ്ഞ മാസം 15നാണ് മംഗലാപുരം സ്വദേശികളായ സാനിയാ- മിത്താഹ് ദമ്പതികളുടെ 15 ദിവസം പ്രായമായ കുഞ്ഞിനെ ആശുപത്രിയിലെത്തിക്കുന്നത്. കുട്ടിയെ മംഗലാപുരത്തുനിന്നും തിരുവനന്തപുരം ശ്രീചിത്ര ആശുപത്രിയിലേക്ക് ആംബുലന്‍സില്‍ റോഡ്മാര്‍ഗം കൊണ്ടുപോകുന്നതിനിടയില്‍ ആരോഗ്യ മന്ത്രിയുടെ നിര്‍ദേശ പ്രകാരമാണ് കൊച്ചിയിലെ ആശുപത്രിയില്‍ പ്രവേശിപ്പിച്ചത്. ആശുപത്രിയില്‍ എത്തിച്ച കുട്ടിക്ക് അതി സങ്കീര്‍ണമായ ശസ്ത്രക്രിയയാണ് നടത്തിയത്. കാര്‍ഡിയോ പള്‍മണറി ബൈപ്പാസ് ശസ്ത്രക്രിയയിലൂടെ കുട്ടിയുടെ ഹൃദയ വാല്‍വിന്റെ സങ്കോചം ശരിയാക്കുകയും, ഹൃദയത്തിന്റെ ദ്വാരം അടക്കുകയും, ഹൃദയത്തിന്റെ മഹാധമനിയുടെ കേടുപാടുകള്‍ തിരുത്തുകയും ചെയ്തിരുന്നു. കുട്ടി കൃത്യമായി മുലപ്പാല്‍ കുടിക്കുന്നുണ്ടെന്നും അധികൃതര്‍ അറിയിച്ചു. ഐ.സി.യുവില്‍ നിന്നും കുട്ടിയെ മുറിയിലേക്ക് മാറ്റിയിട്ടുണ്ട്. എന്നാല്‍ പുറത്തുനിന്നും ആരെയും കുട്ടിയെ കാണാന്‍ അനുവദിക്കില്ല.
കുട്ടിയുടെ മാതാപിതാക്കളുടെ നിര്‍ദേശ പ്രകാരവും കുട്ടിയുടെ ആരോഗ്യനില മാനിച്ചുമാണ് സന്ദര്‍ശകരെ അനുവദിക്കാത്തതെന്നും അധികൃതര്‍ അറിയിച്ചു. കുഞ്ഞുമായി അടുത്തയാഴ്ച വീട്ടില്‍പോകാന്‍ കഴിയുമെന്ന സന്തോഷത്തിലാണ് മാതാപിതാക്കള്‍.