അങ്കാറ: റഷ്യയില്‍നിന്ന് എസ് 400 എയര്‍ മിസൈല്‍ പ്രതിരോധ സിസ്റ്റം വാങ്ങിയതു സംബന്ധിച്ച് അമേരിക്കയുടെ ഭീഷണിക്കു മുന്നില്‍ മുട്ടുമടക്കില്ലെന്ന് തുര്‍ക്കി. വിഷയത്തില്‍ അന്താരാഷ്ട്ര കരാറുകളുടെ ലംഘനം നടന്നിട്ടില്ലെന്നു വ്യക്തമാക്കിയ തുര്‍ക്കി വൈസ് പ്രസിഡന്റ് ഫുആദ് ഓക്തായ്, അമേരിക്കയുടെ ഭീഷണിക്കു വഴങ്ങില്ലെന്നും വ്യക്തമാക്കി.
വിഷയത്തില്‍ അന്താരാഷ്ട്ര കരാറുകളുടെ ലംഘനം നടന്നെന്ന് ആരോപിച്ചിരുന്ന അമേരിക്ക, നീക്കത്തില്‍നിന്നു തുര്‍ക്കി പിന്മാറിയില്ലെങ്കില്‍ ഉപരോധം നേരിടേണ്ടിവരുമെന്നു മുന്നറിയിപ്പ് നല്‍കുകയും ചെയ്തിരുന്നു. എസ് 400 വാങ്ങുന്നതിനായി കരാറിലെത്തിയെന്നും കരാറുമായി ബന്ധപ്പെട്ട് പണം കൈമാറിയെന്നും ഇനി പിന്മാറുന്ന പ്രശ്‌നമില്ലെന്നും തുര്‍ക്കി വൈസ് പ്രസിഡന്റ് വ്യക്തമാക്കി.