ന്യൂഡല്‍ഹി: ചൈനയുടെ മൂന്നു മാധ്യമപ്രവര്‍ത്തകരെ ഇന്ത്യ പുറത്താക്കി. ചൈനീസ് സര്‍ക്കാര്‍ വാര്‍ത്താ ഏജന്‍സിയായ സിന്‍ഹുവയുടെ റിപ്പോര്‍ട്ടര്‍മാരെയാണ് വിസ നീട്ടി നല്‍കാതെ തിരിച്ചയച്ചത്.

ഇരു രാജ്യങ്ങളും തമ്മില്‍  വിവിധ വിഷയങ്ങളില്‍ അസ്വാരസ്യങ്ങള്‍ നിലനില്‍ക്കെയാണ് ഇന്ത്യയുടെ നടപടി. ജൂലൈ 31നകം ഇന്ത്യ വിട്ടുപോകാനാണ് മാധ്യമപ്രവര്‍ത്തകര്‍ക്ക് നിര്‍ദേശം നല്‍കിയിരിക്കുന്നത്. സിന്‍ഹുവയുടെ റിപ്പോര്‍ട്ടര്‍മാരായി ഡല്‍ഹിയില്‍ പ്രവൃത്തിക്കുന്ന  വൂ ക്വിയാങ്, ലു താങ്എന്നിവരോടും മുബൈയിലുള്ള ഷി യോങ്ഗാങിനോടുമാണ് നാടുവിടാന്‍ പറഞ്ഞിട്ടുള്ളത്.

വിസാ കാലാവധി നീട്ടി നല്‍കാത്തത്തിന് പ്രത്യേകിച്ച് കാരണമൊന്നും അധികൃതര്‍ പറഞ്ഞിട്ടില്ലെന്നാണ് ഇവര്‍ പറയുന്നത്. എന്‍.എസ്.ജിയുമായി (ആണവ വിതരണ ഗ്രൂപ്പ്) ബന്ധപ്പെട്ട് ഇന്ത്യക്കെതിരേ ചൈന നിലപാടെടുത്തിരുന്നു.

വു ക്വിയാങ് ഏഴ് വര്‍ഷമായി ഇന്ത്യയില്‍ പ്രവര്‍ത്തിക്കുകയാണ്. മറ്റ് രണ്ടു പേര്‍ കഴിഞ്ഞ വര്‍ഷമാണ് എത്തിയത്. ചൈനീസ് ഭരണകൂടത്തിന്റെ നേരിട്ടുള്ള നിയന്ത്രണത്തിലാണ് സിന്‍ഹുവ പ്രവൃത്തിക്കുന്നത്. പ്രധാനമന്ത്രിയുടെ നേതൃത്വത്തിലുള്ള സ്റ്റേറ്റ് കൗണ്‍സിലാണ് ഇതിനെ നിയന്ത്രിക്കുന്നത്.

മാധ്യമപ്രവര്‍ത്തകരോട് രാജ്യം വിടാന്‍ നിര്‍ദേശിച്ചതുമായി ബന്ധപ്പെട്ട് ചൈനയുടെ പ്രതികരണം ഇതുവരേ വന്നിട്ടില്ല. ഇന്ത്യന്‍ മാധ്യമപ്രവര്‍ത്തകരെ പുറത്താക്കി ചൈന പ്രതികരിച്ചേക്കുമെന്നു നിരീക്ഷകര്‍ വിലയിരുത്തുന്നുണ്ട്. നിലവില്‍  ബീജിങില്‍ അഞ്ചു ഇന്ത്യന്‍ മാധ്യമപ്രവര്‍ത്തകരുണ്ട്.