മട്ടന്നൂര്‍: മട്ടന്നൂരില്‍ രാജ്യാന്തര നിലവാരത്തിലുള്ള ഷോപ്പിങ് മാളായ ലിങ്ക്‌സ് മാള്‍  പ്രവര്‍ത്തനമാരംഭിച്ചു.  മട്ടന്നൂര്‍- തലശേരി റോഡില്‍ ഒരുലക്ഷം ചതുരശ്ര അടി വിസ്തീര്‍ണത്തില്‍ നിര്‍മിച്ച ആധുനിക ഷോപ്പിങ്മാളിന്റെ ഉദ്ഘാടനം ചലച്ചിത്ര നടന്‍ ഉണ്ണികൃഷ്ണന്‍ നമ്പൂതിരി നിര്‍വഹിച്ചു. സിനിമാ നടി മാളവിക മേനോന്‍ മുഖ്യാതിഥിയായിരുന്നു.
ലിങ്ക്‌സ് മാള്‍ മാനേജിങ് ഡയരക്ടര്‍ ഇ.കെ ശശിയും അമ്മ കെ.കെ യശോദയും ഭദ്രദീപം തെളിയിച്ചു.
നഗരസഭാ ചെയര്‍മാന്‍  കെ ഭാസ്‌കരന്‍, സി ഐ  ഷജു ജോസഫ്, സിനിമാ സംവിധായകന്‍ സലീം അഹമ്മദ്, സുദിഷ്ണ ശശി, കെ കെ ശ്രീനിവാസന്‍, ബിജോയ് ശശി  തുടങ്ങിയവര്‍ ഉദ്ഘാടനച്ചടങ്ങില്‍ സംബന്ധിച്ചു.
 മള്‍ട്ടിപ്ലക്‌സ് തിയേറ്റര്‍, മലബാറി, ഇന്ത്യന്‍, സൗത്ത് ഇന്ത്യന്‍, ചൈനീസ് വിഭവങ്ങള്‍ ഉള്‍പ്പെടെ ലഭ്യമാകുന്ന വിവിധ ഫുഡ്‌കോര്‍ട്ടുകള്‍, വിവിധ ബ്രാന്‍ഡുകളുടെ ഷോറൂമുകള്‍, ദേശീയ അന്തര്‍ദേശീയ നിലവാരത്തിലുള്ള വസ്ത്ര ശേഖരം, ഗെയിംസ് സോണ്‍ തുടങ്ങിയവയ മാളില്‍ ഒരുക്കിയിട്ടുണ്ട്.  200 വാഹനങ്ങള്‍ക്ക് പാര്‍ക്കിങ് സൗകര്യമുണ്ട്. കണ്ണൂര്‍ വിമാനത്താവളത്തില്‍നിന്ന് മൂന്ന് കിലോമീറ്റര്‍ ദൂരമാണ് മാളിലേക്കുള്ളത്.